За пазыкі дыктатара давядзецца павялічыць тарыфы ЖКГ і збанкрутаваць прадпрыемствы

Місія МВФ прагназуе, што ў 2017 годзе беларуская эканоміка не выйдзе з рэцэсіі.

Пра гэта гаворыцца ў высновах місіі паводле вынікаў працы ў Менску 21-30 чэрвеня, паведамляе БелаПАН.

Кіраўнік місіі МВФ у Беларусі Пітэр Долман на брыфінгу паводле вынікаў працы місіі МВФ у рамках штогадовых кансультацый паводле Артыкула IV адзначыў, што беларускія афіцыйныя органы распачалі шэраг важных крокаў, уключаючы наступныя: далейшая лібералізацыя цэн; павышэнне ўзроўню кампенсацыі выдаткаў за кошт тарыфаў на жыллёва-камунальныя паслугі; і рэфармаванне дзяржаўных прадпрыемстваў.

«Апошні з пералічаных крокаў уключае ўжытыя нядаўна афіцыйныя захады ў замене мэтавых паказчыкаў вытворчасці індыкатарамі эфектыўнасці, пачатак паэтапнага скарачэння дырэктыўнага крэдытавання і пастанову аб падзеле функцый уласніка і рэгулятара», - мяркуюць у МВФ.

Для ўдасканалення размеркавання рэсурсаў МВФ рэкамендуе вылучыць патрабаванне аб пераходзе ўсіх дзяржпрадпрыемстваў на міжнародныя стандарты бухгалтарскага ўліку.

Акрамя таго, Фонд рэкамендуе правядзенне паглыбленай інвентарызацыі дзяржаўных прадпрыемстваў для вызначэння тых з іх, якія выконваюць камерцыйныя функцыі, а не функцыі органаў кіравання, і трансфармацыі ўсіх камерцыйных прадпрыемстваў у акцыянерныя таварыствы.

У рамках рэформы сектара МВФ раіць правесці рэструктурызацыю дзяржаўных прадпрыемстваў, у тым ліку і за кошт правядзення выразных працэдур банкруцтва і прыватызацыі; сфармуляваць захады палітыкі ў дасягненні да 2018 года поўнай выплаты выдаткаў за кошт тарыфаў жыллёва-камунальных паслуг з выразна устаноўленымі тэрмінамі рэалізацыі гэтых захадаў; удасканальваць дзелавое асяроддзе, у тым ліку за кошт скарачэння дробных падаткаў, а таксама ўжыць захады ў далучэнні да СГА.

Пры гэтым МВФ прагназуе захаванне рэцэсіі ў Беларусі ў 2017 годзе.

«Мы чакаем, што рэцэсія ў Беларусі ў 2016-2017 гадах будзе захоўвацца», - адзначыў кіраўнік місіі МВФ. Згодна з ацэнкай МВФ, ВУП краіны ў 2016 годзе знізіцца на 3%, у 2017-м - на 0,5%.

Адказваючы на пытанне аб прычынах такога прагнозу, кіраўнік місіі МВФ паведаміў, што магчымасці беларускай эканомікі моцна залежаць ад стану і перспектыў работы сектара дзяржаўных прадпрыемстваў.

«Асноўная задача беларускага ўрада сёння - стварэнне ўмоў для эканамічнага росту. На гэтым шляху сур'ёзным выклікам з'яўляецца сектар дзяржпрадпрыемстваў. Мы бачым, што дзяржпрадпрыемствы нясуць страты, ім складана канкураваць, і таму развязанне праблем дзяржсектара з'яўляецца вельмі важным пытаннем», - сказаў Долман.

Для рэфармавання сектара дзяржпрадпрыемстваў спатрэбіцца некалькі гадоў, адзначыў ён.

«Мы мяркуем, што для правядзення рэформаў неабходна стварыць сістэму сацыяльнай падтрымкі насельніцтва. Аднак мы чакаем, што працэс рэфармавання дзяржсектара будзе складаным, і таму мяркуем, што рэцэсія ў 2016-2017 гадах будзе захоўвацца», - сказаў Долман.