Праціўнікі «брэксіту» збіраюцца ў Лондане на марш пратэсту

У цэнтры Лондана пройдзе масавая акцыя супраць выхаду Брытаніі з ЕЗ, у якой будуць удзельнічаць тысячы чалавек.

Дэманстранты збяруцца на Парк-лейн аб 11-й раніцы і пройдуць маршам да пляцу ля будынка парламента.

Арганізатар суботняй акцыі, выпускнік Каралеўскага коледжа Лондана Кіран Макдэрмат абвесціў, што пратэстоўцы будуць дамагацца ад парламенту "прыняцця адказнай пастановы", паведамляе BBC.

"Мы можам прадухіліць “брэксіт”, адмаўляючыся прызнаць апошняе слова за рэферэндумам, і прыбраць палец з кнопкі самазнішчэння", – прыводзіць ягоныя словы газета Independent.

Пра свой удзел у запланаваным мерапрыемстве заявілі 34 тысячы карыстальнікаў сацсетак, хоць рэальная яўка можа моцна адрознівацца.

На рэферэндуме пра сяброўства Брытаніі ў ЕЗ 23 чэрвеня перамогу атрымалі прыхільнікі выхаду краіны з звязу.

Рэакцыяй еўрапейскіх лідараў на вынікі рэферэндуму стала патрабаванне да Лондана як мага хутчэй пачаць працэдуру выхаду з Еўразвяза. У выніку "брэксіту" Брытанія можа пазбавіцца часткі пераваг гандлёвых пагадненняў з краінамі ЕЗ.

Большасць жыхароў гарадскіх раёнаў і моладзь галасавалі за тое, каб застацца ў Еўразвязе. У Лондане супраць выхаду з еўрапейскай супольнасці выказаліся каля 60%.

Ужо на наступны дзень пасля абвяшчэння вынікаў рэферэндуму петыцыю з патрабаваннем правядзення паўторнага галасавання падпісалі больш за 2 млн чалавек, на сёння – ужо каля 4 мільёнаў.