Польскі экспэрт: Мужчына з кіем на відэа можа быць забойцам Шарамета
99- 21.07.2016, 13:10
- 15,825
Мужчына на відэа паводзіць сябе занадта ненатуральна для простага відавочцы выбуху пасярод вуліцы.
Відэазапіс выбуху, які забіў Паўла Шарамета для «Белсата» пракаментаваў Анджэй Мрочак, былы кіраўнік аператыўнай секцыі ў справах тэрактаў Аддзела барацьбы з Крымінальным тэрарызмам і забойствамі варшаўскай паліцыі, а цяпер - экспэрт Цэнтра даследаванняў тэрарызму ўніверсітэта Collegium Civitas і экспэрт City Security.
- Што вам кінулася ў вочы на гэтым відэазапісу?
- Мужчына ў шапцы з кіем паводзіць сябе ненатуральна. Звярніце ўвагу - на пачатку відэа гэты мужчына ідзе з таго ж кірунку, з якога едзе машына Шарамета. Ён даходзіць да скрыжавання і затрымоўваецца. Машына яшчэ не даехала, а ён ужо затрымаўся. Стаіць спіной да вуліцы. У момант выбуху ён працягвае стаяць спіной і нават не здрыгануўся ад выбуху. Пасля выбуху звярніце ўвагу на яго левую руку. Як бы ён нешта папраўляў, каб не выпала з кішэні.
- Ён вымае руку з левай кішэні, хавае палку пад левую падпаху і пачынае бегчы.
- Толькі праз імгненне ён паварочваецца, і калі бачыць, што да машыны бягуць людзі, то ён таксама пачынае бегчы. І кій яму ўжо не патрэбны. Спачатку я думаў што ён глухі. Але, здаецца, ён проста прывык да выбухаў.
Ён бяжыць як малады хлопец а не як чалавек, які выкарыстоўвае кіёк. Дзіўныя паводзіны. Шапка, кій, а бегае, як малады. Узнікае пытанне: ці дачакаўся гэты мужчына паліцыю і ці склаў сведкавыя паказанні? Ёсць імавернасць, што ён падбег да машыны толькі каб праверыць, ці атрымалася забойства. Не выключана, што менавіта ён мог дэтанаваць выбуховую прыладу на адлегласці.
- На двары лета. Амаль нікога няма ў шапках, а тым больш у чорных куртках.
- Кій і шапка - гэта камуфляж.
- Вы ў ліхія 90-я гады працавалі ў варшаўскай паліцыі і змагаліся з арганізаванай злачыннасцю. Сустракалі вы падобныя забойствы ў сваёй кар'еры?
- Так. У такога тыпу замахах выканаўца знаходзіцца блізка і назірае. Яму трэба пераканацца, што ахвяра мёртвая. Мой досвед падказвае, што гэта менавіта такі выпадак.