Генпракурор Украіны назваў галоўную версію забойства Шарамета
3- 23.07.2016, 20:48
- 13,309
Генеральны пракурор Украіны Юры Луцэнка назваў асноўную версію забойства журналіста Паўла Шарамета.
Пра гэта паведаміла ў «Фэйсбуку» прэс-сакратарка Луцэнкі Ларыса Сарган, паведамляе charter97.org.
«Мы разглядаем усе версіі, але ключавой з'яўляецца помста за прафесійную дзейнасць Паўла», – сказаў Луцэнка.
Правяраецца таксама інфармацыя пра тое, што кіраўнік крымінальнай паліцыі Вадзім Траян нібыта арганізаваў сачэнне за журналістамі, высокапастаўленымі чыноўнікамі і кіраўніцтвам Нацпаліцыі, паводле гэтага факта адкрыты крымінальны працэс.
Акрамя таго, праводзіцца ўнутранае расследаванне адносна тых супрацоўнікаў МУС, якія перадалі відэазапіс з матэрыялаў следства журналістам. Луцэнка паабяцаў, што іх звольняць.
Нагадаем, Павел Шарамет загінуў 20 ліпеня ў выніку выбуху аўтамабіля ў цэнтры Кіева. Выбух адбыўся ў 7:45, калі ён ехаў у аўтамабілі.
На адным з запісаў, паводле наяўнай інфармацыі, зафіксаваны момант закладкі выбуховага прыстасавання. Як паведаміла журналістам крыніца ў праваахоўных органах, устаноўлена, што мэтай выбуху быў менавіта Павел Шарамет.
23 ліпеня забіты беларускі журналіст Павел Шарамет быў пахаваны побач з магілай бацькі на Паўночных могілках Менска.
Да расследавання падключыліся супрацоўнікі ФБР, пра дапамогу якіх папрасілі ўкраінскія ўлады. 21 ліпеня яны сустрэліся з кіраўніцтвам Нацыянальнай паліцыі Украіны.
Прэзідэнт Украіны Пётр Парашэнка не выключыў, што забойства Паўла Шарамета было здзейсненае з мэтай дэстабілізацыі сітуацыі ў краіне.
Спачуванні родным і блізкім Шарамета выказалі найвышэйшыя асобы дзяржаваў, кіраўнікі знешнепалітычных установаў, міжнародныя арганізацыі. Беларускае кіраўніцтва ад любых ацэнак таго, што адбылося, устрымліваецца.