Наймацнейшыя расейскія плыўцы не трапяць на гульні ў Рыа

Расейкі Юлія Яфімава і Наталля Лаўцова не адпавядаюць крытэрам, якія вылучаныя МАК.

Міжнародны алімпійскі камітэт дапусціў каманду Расеі да ўдзелу ў Гульнях у Бразіліі, аднак звярнуў увагу, што кожны расейскі спартовец, які прэтэндуе на паездку ў Рыа-дэ-Жанейра, павінен адпавядаць пэўным крытэрам.

У тым ліку на Алімпіяду не будуць дапушчаны тыя спартоўцы, якія калі-небудзь былі абвінавачаныя ва ўжыванні допінгу. У тым ліку гаворка ідзе і пра тых спартоўцах, якія ўжо адбылі дыскваліфікацыю.

Юлія Яфімава і Наталля Лаўцова ў розны час адбылі дыскваліфікацыю за ўжыванне допінгу, таму іх удзел у Алімпіядзе малаверагодны, піша РБК.

Лаўцова, рэкардсменка Расеі ў плаванні на 50 метраў батэрфляем, была дыскваліфікаваная за парушэнне антыдопінгавых правілаў у 2012 годзе. Тэрмін дыскваліфікацыі склаў 2,5 года.

Юлія Яфімава, чатырохразовая чэмпіёнка свету і ўладальніца алімпійскай бронзы, была абвінавачаная ва ўжыванні стэроіднага гармону ў міжсезонны перыяд у студзені 2014 года. Спартоўка спаслалася, што забаронены прэпарат утрымліваўся ў біядабаўцы для зніжэння вагі. Тэрмін дыскваліфікацыі склаў 1,5 года.

«У нас у камандзе ёсць спартоўцы з допінг-выпадкамі, якія адбылі дыскваліфікацыю. З лідараў гэта Яфімава і Лаўцова, мы павінны будзем атрымліваць пазіцыю FINA па гэтым пытанні і растлумачыць сітуацыю», - сказаў агенцтву «Р-Спорт» праз тэлефон кіраўнік Усерасейскай федэрацыі плавання Уладзімір Сальнікаў.