ЗША выключылі ўдзел Расеі ў кааліцыі супраць ІД

Вашынгтон не давярае Маскве, якая падтрымлівае афіцыйны ўрад Сірыі як матэрыяльна, так і ў вайсковай галіне.

Спецыяльны прадстаўнік прэзідэнта ЗША ў міжнароднай кааліцыі ў барацьбе з тэрарыстычнай групоўкай «Ісламская дзяржава» Брэт Макгурк выключыў сяброўства Расеі ў гэтым аб'яднанні. Пра гэта паведамляе newsru.com са спасылкай на тэлеканал Sky News Arabia.

Прадстаўнік Барака Абамы паказаў, што «Вашынгтон не давярае Маскве, якая падтрымлівае (афіцыйны) ўрад Сірыі як матэрыяльна, так і ў вайсковай вобласці», паведамляе ТАСС.

Макгурк адзначыў, што РФ і ЗША каардынуюць дзеянні пры нанясенні ўдараў па тэрарыстычнай групоўцы «Джэбхат ан-Нусра». З іншага боку, са слоў спецпрадстаўніка амерыканскага лідара, на Расеі ляжыць адказнасць па выкананні пагаднення аб перамір'і ў Сірыі.

Як мяркуе прадстаўнік Абамы, Расея ў гэтым кірунку павінна «аказваць ціск на сірыйскі ўрад», які, на думку Макгурка, «пастаянна парушае гэта пагадненне».

Мінабароны РФ напярэдадні прапанавала заходнім партнёрам Расеі прыступіць да сумесных дзеянняў супраць тэрарыстаў у Сірыі. Пра гэта заявіў афіцыйны прадстаўнік установы генерал-маёр Ігар Канашэнкаў, каментуючы публікацыі СМІ пра ўдар расейскіх самалётаў па базе паўстанцаў, якую выкарыстоўваюць ЗША і Брытанія. Ён назваў сумесныя аперацыі «простым спосабам развязання праблем».

Генерал прама не пацвердзіў нанясенне ўдару ВКС па гарнізону ля мяжы з Іарданіяй, але даў зразумець, што такія інцыдэнты магчымыя. Ён адзначыў, што трэба не вінаваціць Расею, а своечасова перадаваць звесткі аб размяшчэнні атрадаў.

Дагэтуль газета The Wall Street Journal са спасылкай на крыніцы ў Пентагоне і Белым доме паведамляла пра тое, што 16 чэрвеня расейскія баявыя самалёты нанеслі ўдары па сакрэтнай базе ў населеным пункце Ат-Танф на мяжы з Іарданіяй, якую выкарыстоўваюць амерыканскія і брытанскія вайскоўцы. У дзень атакі блізу 20 брытанскіх вайскоўцаў, якія знаходзіліся на базе, паспелі пакінуць яе менш чым за суткі да здарэння, гаварылася ў артыкуле.

Між тым афіцыйны прадстаўнік групы войскаў ЗША, якія ўдзельнічаюць у контртэрарыстычнай аперацыі ў Іраку і Сірыі, палкоўнік Крыстафер Гарвер у нядзелю даў справаздачу па колькасці кантынгенту міжнароднай кааліцыі ў барацьбе з ІД. З яго слоў, яна налічвае 7 тысяч вайскоўцаў. У той жа час, як адзначае ТАСС, Гарвер не ўдакладніў, якія краіны прэзентавалі свае баявыя атрады ў распараджэнне камандавання кааліцыі і якая колькасць іх фармаванняў.

Міжнародная кааліцыя на чале з ЗША была сфармаваная летам 2014 года. Фармальна аб удзеле ў гэтым аб'яднанні заявілі блізу 60 краін. У канцы лета 2014 года ВПС кааліцыі пачалі бамбардзіроўкі пазіцый экстрэмісцкіх груп на тэрыторыі Іраку, а праз месяц - на тэрыторыі Сірыі.