У беларускіх ВНУ засталіся незанятымі больш за сто бюджэтных месцаў

На некаторыя спецыяльнасці ў ВНУ будзе праводзіцца дадатковы набор.

Беларускія ВНУ, у якіх з 26 да 28 ліпеня будзе праводзіцца прыём дакументаў у дадатковым наборы на бюджэтныя дзённую і завочную формы атрымання адукацыі, апублікавалі пералік спецыяльнасцяў, дзе засталіся вакантныя месцы, паведамляе БелТА.

У Магілёўскім дзяржаўным універсітэце імя А.А. Куляшова на дзённай форме навучання вакантнымі засталіся 10 месцаў па спецыяльнасці «фізіка і інфарматыка» і 4 - па спецыяльнасці «матэматыка і інфарматыка». На завочнай форме дадатковы набор праводзіцца па спецыяльнасці «пачатковая адукацыя» (скарочаны тэрмін навучання) - вакантныя 9 месцаў.

У Віцебскім дзяржаўным тэхналагічным універсітэце дадатковы набор на дзённую форму атрымання адукацыі будзе праводзіцца па наступных спецыяльнасцях: «вытворчасць тэкстыльных матэрыялаў (тэхналогія і мэнэджмэнт)» (24 вакантныя месцы), «машыны і апараты лёгкай, тэкстыльнай прамысловасці і бытавога абслугоўвання» (14), «канструяванне і тэхналогія швейных вырабаў»(15), «канструяванне і тэхналогія вырабаў са скуры»(9).

На геаграфічным факультэце БДУ на дзённай форме навучання вакантнымі засталіся па два месцы на спецыяльнасцях «геалогія і разведка карысных выкапняў», геаінфармацыйныя сістэмы (напрамак - зямельна-кадастравыя)», а на спецыяльнасці «гідраметэаралогіі» - 7.

На вайсковым факультэце на спецыяльнасць «геаінфармацыйныя сістэмы (напрамак - спецыяльныя)» засталіся вакантнымі два месцы. На завочнай форме геафака на спецыяльнасці «геаэкалогія» засталіся чатыры вакантныя месцы, на гістарычным факультэце на «дакументазнаўства» - два, у Інстытуце журналістыкі на спецыяльнасці «журналістыка (напрамак - друкаваныя СМІ)» - тры.

У Мазырскім дзяржаўным педагагічным універсітэце імя І.П. Шамякіна ёсць 11 вакантных месцаў на спецыяльнасці «матэматыка і інфарматыка» (дзённая форма) і 8 - на «прафесійнае навучанне (машынабудаванне)» (завочная скарочаная форма).

На пакінутыя бюджэтныя месцы могуць падаваць дакументы абітурыенты, якія здалі здавальняюча ўступныя выпрабаванні, неабходныя для паступлення на гэтую спецыяльнасць (напрамак спецыяльнасці).

Падрабязная інфармацыя аб уступнай кампаніі ва ўстановах вышэйшай, сярэдняй спецыяльнай і прафесійнай адукацыі Беларусі прадстаўлена на партале Міністэрства адукацыі ў раздзеле «Абітурыенту», а таксама на сайтах устаноў адукацыі.