Міліцыя занялася беларусамі, якія здаюць у арэнду жыллё замежнікам

«Падазроных» замежнікаў і арэндаванае ім жыллё хочуць выяўляць у онлайн-рэжыме.

МУС Беларусі распрацуе інфармацыйны рэсурс, з дапамогай якога суб'екты, якія здаюць жылыя памяшканні, змогуць у рэжыме онлайн уносіць адпаведную інфармацыю аб замежных грамадзянах, паведаміла interfax.by ўпраўленне інфармацыі і грамадскіх сувязей МУС са спасылкай на начальніка дэпартамента грамадзянства і міграцыі Аляксея Бегуна.

«Да 1 кастрычніка 2017 года міністэрства ўнутраных спраў распрацуе бясплатны інфармацыйны рэсурс, з дапамогай якога суб'екты, якія здаюць жылыя памяшканні ў арэнду, змогуць у рэжыме онлайн уносіць адпаведную інфармацыю аб замежных грамадзянах», - сказаў Бягун.

Як паведамлялася, у панядзелак Лукашэнка падпісаў закон «Аб унясенні змяненняў і дапаўненняў у некаторыя законы Рэспублікі Беларусь у пытаннях вымушанай міграцыі». Дакумент прадугледжвае, у тым ліку, змяненне тэрміну, цягам якога арганізацыі, суб'екты аграэкатурызму і індывідуальныя прадпрымальнікі, якія здаюць жыллё замежным грамадзянам, што часова знаходзяцца ў Беларусі, абавязаны інфармаваць аб гэтым органы ўнутраных спраў.

З 1 кастрычніка 2017 года ён скарачаецца з адных сутак да трох гадзін.

Як адзначыў Бягун, «гэта комплексная пастанова, накіраваная, з аднаго боку, на палягчэнне працы падраздзяленняў па грамадзянстве і міграцыі, а з другога боку - на правядзенне ў рэжыме онлайн спецыяльных праверак і выяўленне тых замежнікаў, знаходжанне якіх на тэрыторыі Беларусі непажаданае, і тых, якія ўяўляюць пагрозу нацыянальнай бяспецы».