Расейскі генпадрадчык пра аварыю на АЭС: На рэактары проста сцерлася фарба

Генпадрадчык будаўніцтва сцвярджае, што на Беларускай АЭС была «звычайная штатная сітуацыя, як гэта бывае на будоўлі».

Пра гэта «Радыё Свабода» заявіла кіраўніца ўправы камунікацый Ніна Дземянцова.

Паводле яе слоў, на Беларускай АЭС адбылася «звычайная штатная сітуацыя, як гэта бывае на будоўлі».

«Мы ж ужо напісалі (гэта было нават у афіцыйным лісце, перададзеным беларускаму боку), што сцерлася фарба пры правядзенні такелажных работ падчас перамяшчэння корпуса рэактара. Гэта будоўля. Гэта штатная звычайная сітуацыя. Ну не бывае, каб на будоўлі чагосьці там не было. Я думаю, што гэта можна назваць штатнай сітуацыяй. Гэта не надзвычайнае здарэнне, не інцыдэнт», - заявіла яна, падкрэсліўшы, што «корпус рэактара знаходзіцца за межамі рэактарнага аддзялення».

Ніна Дземянцова адзначыла, што пацвярджэннем таго, што нічога сур'ёзнага не адбылося, з'яўляецца тое, што «Атамбудэкспарт» працуе ў звычайным рэжыме.

«Паверце мне, я сяджу ў горадзе-героі Маскве. Усё кіраўніцтва тут. Усё абсалютна спакойна, праўда. Вы ж цудоўна разумееце, калі нешта адбываецца, усе адразу нясуцца, зламаўшы галаву. Калі б нешта здарылася, то гэта была б паніка, усе павінны былі б быць там. А ў нас усе на месцах: не ў Беларусі, а ў Маскве і ў Ніжнім Ноўгарадзе. У нас усё ў працоўным рэжыме, ідуць нарады, сустрэчы - ідзе звычайная праца», - запэўніла кіраўніца ўправы камунікацый.

Ніна Дземянцова заявіла, што ў «Атамбудэкспарце» нічога не хаваюць ад грамадскасці.

«У нас усё марудзіў штаб, мы ўсе аператыўна далажылі, напісалі, далі ў прэсу. Працуе камісія МАГАТЭ. Нам важна, каб усё было нармальна. Мы нічога не баімся. Аб выніках працы місіі МАГАТЭ мы праінфармуем СМІ, грамадскасць, сумежныя дзяржавы. Мы - генеральны падрадчык, на якім ляжыць адказнасць за бяспеку ўсіх работ, і мы зацікаўленыя больш чым хто-небудзь у адсутнасці ўсякіх сумненняў у надзейнасці абсталявання і ўсіх работ».

На думку кіраўніцы ўправы камунікацыі, тэма здарэння на БелАЭС «штучна раздзімаецца нядобразычліўцамі».

«Гэта ўсё - толькі апазіцыйныя праекты актывістаў. Мы маніторым гэтыя публікацыі кожную раніцу, адна прыгажэйшая за другую. Гэта ж палітыка», - кажа яна.

25 ліпеня ў СМІ з'явіліся паведамленні, што 10 ліпеня падчас выпрабавальнага трэніровачнага ўсталявання корпуса рэактара 330-тонны агрэгат сарваўся і ўпаў з вышыні ад 2 да 4 метраў. Паведамлялася таксама, што месца надзвычайнага здарэння ачэпленае і знаходзіцца пад сталай і ўзмоцненай аховай.

Пасля працяглага маўчання Міністэрства энэргетыкі Беларусі прызнала:

«Паводле інфармацыі генеральнага падрадчыка «Атамбудэкспарт», няштатная сітуацыя адбылася на пляцоўцы захоўвання корпуса рэактара пры правядзенні такелажных работ падчас яго перамяшчэння ў гарызантальнай плашчыні».