У Бельгіі затрымалі двух падазраваных у падрыхтоўцы тэракту
- 30.07.2016, 12:22
- 16,237
Браты Нурадзін і Хамза Х. у суботу паўстануць перад судом.
Бельгійская паліцыя падчас ператрусаў затрымала двух чалавек паводле падазрэння ў падрыхтоўцы тэрарыстычнага нападу, распавялі ў пракуратуры Бельгіі, паведамляе BBC.
Затрыманыя - браты Нурадзін і Хамза Х. Пазней у суботу яны паўстануць перад судом, які вызначыць, ці можна падоўжыць ім першапачатковы, 24-гадзінны, тэрмін затрымання.
У заяве федэральнай пракуратуры гаворыцца, што паліцыя правяла ператрусы ў некалькіх дамах у раёне гарадоў Монс і Льеж.
Паліцыянты не выявілі зброі або выбуховых рэчываў падчас аперацыі.
Раней паведамлялася, што бельгійская паліцыя атрымала папярэджанне аб тым, што група баевікоў ІД нядаўна выехала з Сірыі ў кірунку Еўропы для ўчынення новых тэрактаў у Бельгіі і Францыі.
22 сакавіка ў Брусэлі адбылося некалькі выбухаў, у выніку якіх загінулі 32 чалавекі. Адказнасць за тэракт узяла на сябе экстрэмісцкая групоўка «Ісламская дзяржава».