У Беларусі забароняць курыць у рэстарацыях і на пляжах

А электронную цыгарэту прыраўняюць да звычайнай.

Са шкоднай звычкай змагаюцца не першы год. Рэкламу забаранілі, пачкі ў крамах пахавалі, але беларусы як палілі, так і паляць. Магчыма, справа ў тым, што Беларусь - адна з краін, дзе лаяльна ставяцца да курэння або, прынамсі, не караюць рублём за парушэнне забарон на яго. У ЕЗ забаронена курэнне ў грамадскіх месцах, у тым ліку ў кавярнях і барах, штраф - да 1000 еўраў. У нас - 84 рублі (38 еўраў). Ды і кошт на цыгарэты - не завоблачны. Напрыклад, у ЗША, дзе ён даходзіць да 12 даляраў за пачак (нашых 24 рублі). У Беларусі пачак цыгарэт распаўсюджанай маркі каштуе 2 - 2,5 рубля, піша kp.by.

У выніку цяпер паліць амаль палова мужчын у краіне. На днях пытанне цыгарэт, звычайных і электронных, абмеркавалі ў кіраўніка. Лукашэнка назваў праблему сур'ёзнай і сказаў, што хутка падпіша абноўлены дэкрэт «Аб дзяржрэгуляванні вытворчасці, абароту і спажывання тытунёвай сыравіны і тытунёвых вырабаў». Што зменіцца?

• У рэстарацыях, барах і кавярні давядзецца абсталяваць спецыяльныя месцы для тых, хто паліць.

- Гэта не асобныя залі для тых, хто паліць і не паліць, а менавіта асобныя памяшканні для палення. Патрабаванні да такiх памяшканняў будуць распрацаваныя асобна, - растлумачыў міністр гандлю Уладзімір Калтовіч.

Многія сталічныя рэстарацыі і кавярні ўжо забаранілі паліць у залі.

- Мы даўно забаранілі паліць у залі, трэба выходзіць на адкрытую веранду, - распавялі ў сталічным Loft Cafe. - Ніхто з наведвальнікаў не абураўся, трэба прайсці ўсяго некалькі метраў.

- У нас паляць ва ўсіх залях, - сказалі ў пабе Malt&Hops. - Госці, якія ўжываюць алкаголь, хочуць папаліць. А ў нас піцейная ўстанова... Вядома, ёсць запыты на залі дзе не паляць, і мы знаходзім месцы далей ад людзей з цыгарэтамі. Асабліва калі наведвальнікі прыходзяць з дзецьмі. Калі выйдзе дэкрэт, абсталюем месца для палення.

• Электронныя цыгарэты цалкам прыраўняюць да звычайных, такія ж патрабаванні будуць да іх продажу і рэкламы.

• Пашырыцца спіс месцаў, дзе курыць забаронена. Яго папоўняць, напрыклад, ліфты, дзіцячыя пляцоўкі і пляжы. Забароняць паліць у машынах і памяшканнях, дзе прысутнічаюць дзеці да 14 гадоў.

• Буйным крамам (больш за тысячу квадратаў) забароняць прадаваць цыгарэты на касах нават у закрытай вітрыне. Да 2017 года ім давядзецца абсталяваць адмысловы аддзел. Да 2020 гэтую норму ўвядуць ва ўсіх крамах.