Імша Папы Францішка сабрала два мільёны чалавек
4- 31.07.2016, 13:26
- 21,507
Падчас заключнай імшы ў Бжэгах (Польшча) пантыфік заклікаў моладзь больш актыўна займацца палітыкай.
Нядзеля, 31 ліпеня, гэта пяты і апошні дзень візіту Папы Рымскага Францішка ў Польшчу, паведамляе «Радыё Польшча».
Галоўнай падзеяй дня з'яўляецца Імша-Пасланне. Гэта апошняя літургія ў рамках Сусветных дзён моладзі, якую ўзначаліў Папа Францішак.
Паводле звестак арганізатараў, у набажэнстве на Полі міласэрнасці ў Бжэгах узялі ўдзел больш за 2 мільёны паломнікаў.
На літургію прыбылі прэм'ер-міністр Польшчы Беата Шыдла, а таксама спікеры Сейма і Сената і лідар кіроўнай партыі «Права і Справядлівасць» Яраслаў Качыньскі.
Падчас набажэнства, Папа Рымскі заклікаў моладзь не гультаяваць, а займацца грамадска-карыснай працай або палітыкай, каб сфармаваць больш справядлівае грамадства.
Раней 31 ліпеня Папа Францішак асвяціў два будынкі арганізацыі Caritas пад Кракавам - Дом міласэрнасці і Дом хлеба.
Таксама сёння адбудзецца сустрэча пантыфіка з валанцёрамі і арганізатарамі Сусветных дзён моладзі.
Нагадаем, Папа Францішак прыехаў у Польшчу для ўдзелу у Сусветных днях каталіцкай моладзі, а таксама каб адзначыць юбілей - 1050-годдзе хрышчэння краіны.