У сярэдняга беларуса больш картак, чым у Зімбабвэ, але менш, чым у Аўстраліі

У Беларусі, паводле апошніх звестак Нацбанку, эмітавана 12,6 млн аплатных картак - прыкладна па 1,33 на кожнага жыхара краіны.

А як ідуць справы з «крэдыткамі» і «дэбіткамі» ў іншых краінах? Myfin.by паспрабаваў высветліць гэта, сабраўшы звесткі з адкрытых крыніц і аб’яднаўшы іх у адну табліцу.

У пераважнай большасці інфармацыя бралася з афіцыйных сайтаў цэнтрабанкаў дзяржаў. Аднак у шэрагу выпадкаў давялося скарыстацца звесткамі даследаванняў фінансавых асацыяцый і кампаній.

Трэба адзначыць, што дзе-нідзе лічбы могуць не да канца дакладна адлюстроўваць рэальнае становішча рэчаў. Справа ў тым, што аплатных картак існуе вялікая мноства, і некаторыя цэнтрабанкі маглі ўключыць або выключыць са статыстыкі нейкія іх тыпы.

Таксама неабходна ўлічваць, што хоць параўноўваліся звесткі ў асноўным за 2015-2016 гады, да іх крыху дадаліся таксама 2014, 2013 і нават 2012. А аплатныя сістэмы развіваюцца хутка - змены адбываюцца ў кароткія тэрміны.

Да прыкладу, у табліцу ўключылі Кітай. Дакладныя звесткі знайшлі толькі за 2008 год у KPMG. Тады ў Паднябеснай налічвалася больш за 1,8 млрд картак пры колькасці жыхароў у 1,3 млрд. На аднаго чалавека атрымлівалася 1,35.

Аднак у 2012-м, паводле звестак Global Information, лік картак у Кітаі зашкаліў за 3 млрд. А насельніцтва амаль не павялічылася. Гэта значыць, на чалавека цяпер прыпадае як мінімум 2,24.