Захопнікі будынку паліцыі ў Ерэване здаліся ўладам

Прыхільнікі групы «Сасна Црэр» здаліся ўладам на ўмове прызнання за імі статусу ваеннапалонных.

Антытэрарыстычная аперацыя, накіраваная на вызваленне тэрыторыі палка патрульна-паставой паліцыі ў Ерэване, закончаная. Усе чальцы ўзброенай групоўкі «Сасна Црэр», якія захапілі будынак паліцыі, здаліся ўладам. Затрымана 20 чалавек, тэрыторыя палка цалкам вызваленая. Пра гэта паведамляе «Інтэрфакс».

Адзін з чальцоў узброенай групы, якая захапіла ў Ерэване будынак палка патрульна-паставой службы, напярэдадні заявіў пра ахвоту здацца ўладам і «застацца ў статусе ваеннапалонных». Заяву ў рэдакцыю «Першага армянскага інфармацыйнага» праз тэлефон перадаў чалец групы «Сасна Црэр» Варужан Авецісян.

«Рэвалюцыянеры апынаюцца ў турмах, пасля выходзяць пераможцамі. Гэта таксама адзін са спосабаў барацьбы. Мы любім цябе, армянскі народ, нас нішто не можа разлучыць, мы не хочам кровапраліцця, мы не можам падняць зброю на тых жаўнераў, якія выконваюць загад, нават калі гэты загад няправільны, і хай гэтая барацьба, нашая ахвяра дасць той корань, які пусціць парастак новай барацьбы», - гаворыцца ў заяве.

«У нас ёсць два варыянты: першы - уступіць у бой з паліцыяй і супрацоўнікамі іншых службаў, праліць кроў людзей, якія не маюць дачынення да рэжыму, і другі - устрымацца ад кровапраліцця ці застацца ў статусе ваеннапалонных, для нас гэта - цяжкі выбар, быць у статусе ваеннапалоннага», - падае партал словы з заявы Авецісян.

Чальцы групы «Сасна Црэр» захапілі тэрыторыю палка патрульна-паставой службы ў ерэванскім раёне Эрэбуні раніцай 17 ліпеня. Пры захопе быў забіты намеснік камандзіра часткі палкоўнік паліцыі Артур Ванаян. Шэсць чалавек, у тым ліку пяцёра паліцыянтаў, атрымалі раны.

Захопнікі патрабавалі вызваліць з турмы лідара апазіцыйнага руху «Устаноўчы парламент» Жырайра Сефіляна, а таксама патрабавалі адстаўкі прэзідэнта Арменіі Сержа Саргсяна.

29 ліпеня мітынг апазіцыі перарос у шэсце да захопленай узброенай групай тэрыторыі пастарунка. Удзельнікі ў адзін момант прарвалі ачапленне паліцыі, спрабуючы наблізіцца да захопленага будынку. Затым дэманстранты былі разагнаныя.

Учора ўвечары дэманстранты перацялі цэнтр Ерэвана: прыхільнікі групы «Сасна црэр» пачалі сядзячую маніфестацыю на галоўнай магістралі сталіцы Арменіі. Аднак пазней дэманстрацыя была разагнаная паліцыяй.