Тыя ж паслугі за меншыя грошы

Уборкай пад'ездаў у Ленінскім раёне занялася прыватная кампанія.

Паступова ў Менску на рынак паслуг ва ўборцы пад'ездаў прыходзяць прыватнікі і прапануюць тыя ж паслугі, але за меншы кошт. Так адбылося і ў Ленінскім раёне, дзе конкурс выйграла ТДА «Клінінг-Плюс», паведамляе агенцтва «Менск-Навіны».

Ва ўсіх чатырох ЖЭУ, размешчаных на тэрыторыі Ленінскага раёна, прыборкай пад'ездаў з 1 жніўня займаецца ТДА «Клінінг-Плюс». Для перамогі ў конкурсе кампаніі давялося значна скінуць кошт. Як паведаміў дырэктар ЖКГ Ленінскага раёна Мікалай Строк, пачатковая выстаўленая на аўкцыён сума паводле ўсіх ЖЭУ складала ў агульнай колькасці 1 152 800 рублёў (дэнамінаваных), канчатковая, прапанаваная ТДА «Клінінг-Плюс», – 874 100 рублёў. Зніжэнне – на 278 700 рублёў. Гэтыя грошы застануцца ў жыхароў.

– Прыборку пад'ездаў цалкам аплачваюць жыхары. Памежна дапускальны тарыф – 53 капейкі за месяц з аднаго зарэгістраванага ў кватэры чалавека. Зыходзячы з гэтага, за вылікам расходаў на дэратызацыю і дезынсэкцыю, якія ўключаюцца ў тарыф, і фармаваўся пачатковы кошт аўкцыёну. Пераможца прапанаваў мінімальную суму, значыць, у жыроўках насупраць адпаведнай паслугі будзе выстаўлена не 53 капейкі, а менш, – апавёў Мікалай Строк.

Кампанія валодае неабходнай матэрыяльна-тэхнічнай базай і штатам прыбіральнікаў.

«Пакуль рана казаць пра тое, як яна спраўляецца са сваімі абавязкамі», – адзначыла намесніца дырэктара ў добраўпарадкаванні, санітарным утрыманні жыллёвага фонду і працы з насельніцтвам прадпрыемства Настасся Вараб'ёва.

Супрацоўнікаў комплекснай уборкі, якія раней падмяталі і мылі пад'езды, жыллёва-эксплуатацыйныя ўчасткі імкнуцца захаваць. Іх, у прыватнасці, пераводзяць на вакансіі ва ўтрыманні двароў. Але былі і звальненні. Яны закранулі тых, хто дрэнна працаваў, меў праблемы з выпіўкай.