Кот паралізаваў працу метэастанцыі ў Белавежскай пушчы
3- 28.08.2016, 11:46
- 5,888
Сёння раніцай на маніторах метэастанцыі зніклі ўсе аператыўныя звесткі аб надвор'і.
Звычайны вясковы кот паралізаваў працу метэастанцыі ў нацыянальным парку «Белавежская пушча».
Малодшы навуковы супрацоўнік нацыянальнага парку Мікіта Якубоўскі прыйшоў на працу і ўбачыў, што няма свежых звестак:
- Апошні раз метэастанцыя перадала інфармацыю пра надвор'е раніцай, а палове шостай. Перазапускаем праграмнае забеспячэнне - нулявы вынік. Пайшлі да станцыі, якая размяшчаецца непадалёк ад адміністрацыйнага будынка. На месцы ўбачылі, што нехта вырваў з зямлі датчык тэмпературы глебы. Тэрыторыя метэастанцыі абгароджана высокім плотам, таму, зразумелая справа, паўсталі пытанні: як, хто і навошта выцягнуў датчык і провад з глыбіні 20 сантыметраў?
Пры дэталёвым разглядзе датчыка і яго злучальнага кабеля стала зразумела, што зламыснік, хутчэй за ўсё, чатырохлапы. Гэта пацвердзілі маленькія сляды, ледзь прыкметныя ў сыпкім пяску. Кот! Як ні ў чым не бывала, ён гарэзнічаў непадалёк.
Спецыялісты дэмантавалі датчык, аднавілі яго, перазапусцілі праграмнае забеспячэнне. Станцыя працуе. Кот не пацярпеў, паведамляе «СБ. Беларусь сегодня».