Брытанская Палата лордаў плануе сабатаваць Brexit

Пазіцыя Палаты лордаў можа прывесці да паўторнага рэферэндуму.

Брытанская Палата лордаў плануе сабатаваць Brexit. Пра гэта паведаміла баранэса Віткрофт, паведамляе «Радыё Польшча».

Былая галоўная рэдактарка «Wall Street Journal» і «Sunday Telegraph» уважае, што парламент, прынамсі, зможа прыпыніць працэдуру запуску 50 артыкула Лісабонскай дамовы, якая вызначае прынцыпы выхаду краіны з Еўрапейскага Звязу.

На гэты момант у Вялікабрытаніі працягваецца юрыдычная спрэчка пра тое, хто менавіта павінен увесці ў дзеянне 50 артыкул Лісабонскага пагаднення - прэм'ер-міністар ці парламент.

Прэс-сакратар брытанскага ўрада заявіў, што прэм'ер-міністр не абавязаны кансультавацца адносна свайго рашэння з парламентам, бо гаворка ідзе аб міжнародных пагадненнях, якія з'яўляюцца каралеўскай прэрагатывай.

Аднак пагадненні ЕЗ былі інкарпараваны ў брытанскае заканадаўства. Выхад з ЕЗ ставіць пад пытанне шмат законаў, якія рэгулююць жыццё дзяржавы і яе грамадзян, у такім выпадку гэта ўжо прэрагатыва парламента, а не ўрада.

У сувязі з гэтым восенню Лонданскі суд разгледзіць некалькі заяў аб пазбаўленні прэм'ер-міністра права вызначаць, калі менавіта пачынаць працэдуру выхаду Вялікабрытаніі з ЕЗ.

Калі раней такія паведамленні гучалі толькі з боку праеўрапейскай большасці ў Палаце абшчын, то цяпер да іх далучылася і Палата лордаў.

Баранэса Віткрофт паведаміла газеце «Times», што і сама гатовая галасаваць за тое, каб пазбавіць прэм'ера Тэрэзу Мэй права на рашэнне аб запуску 50 артыкула, а гэта - на яе думку - можа нават прывесці да правядзення паўторнага рэферэндуму ў справе выхаду Вялікабрытаніі з ЕЗ.