Макейн шостым разам стаў кандыдатам ад рэспубліканцаў у Сенат ЗША
5- 31.08.2016, 12:08
- 4,194
Джон Макейн атрымаў перамогу на праймерыз у штаце Арызона.
Пра гэта паведамляе CNN, не ўдакладняючы дакладных вынікаў галасавання (пераклад - РБК).
Галоўным спаборнікам Макейна ў партыі стала Кэлі Уорд, якая цягам трох гадоў да 2015 года працавала ў верхняй палаце парламента Арызоны. Паводле апытання CNN/ORC, яна саступае ў папулярнасці Макейну на 26%. Ёй гатовыя аддаць сваю перавагу 29% дэлегатаў, у той час як за Макейна галасуюць 55%.
Гэта шосты раз, калі Макейн балатуецца на гэтую пасаду. У пачатку жніўня перавыбранне яго ў сенат падтрымаў кандыдат у прэзідэнты ЗША ад рэспубліканцаў Дональд Трамп.
Вядомы сваімі крытычнымі выказваннямі ў адрас Расеі Джон Макейн узначальвае Міжнародны рэспубліканскі інстытут, які Расея прызнала непажаданай арганізацыяй і абмежавала яе дзейнасць на сваёй тэрыторыі. Сваю дзейнасць у Расеі інстытут ажыццяўляў з 1992 года, аднак спыніў яе ў 2012 годзе пасля прыняцця закона аб замежных агентах.