Стала вядома, колькі зарабляюць у КДБ
38- 31.08.2016, 17:25
- 32,637
Дзеля месцаў у «палатцы» чэкісты вымушаныя публікаваць свае дэкларацыі аб даходах.
Парламенцкія «выбары» часцей за ўсё цікавыя не столькі сваімі вынікамі, якія цалкам прадказальныя, а біяграфічнымі звесткамі кандыдатаў у «дэпутаты».
Гэта рэдкая магчымасць даведацца, колькі афіцыйна зарабляюць дзяржаўныя чыноўнікі і сілавікі, бо ўсе прэтэндэнты павінны публікаваць дэкларацыю аб даходах гадавой даўніны.
Сёлета зарэгістраваныя адразу двое кандыдатаў, месца працы якіх - Камітэт дзяржаўнай бяспекі (КДБ), піша «Наша Ніва».
У Гомельскай Юбілейнай акрузе №31 балатуецца начальнік Інстытута нацыянальнай бяспекі Іван Корж.
У свой час Корж узначальваў Гомельскае і Гарадзенскае аддзяленні КДБ. Гомельскі этап работы Каржа запомніўся шматлікімі спробамі вярбоўкі апазіцыянераў. Ні да, ні пасля ў прэсу не прасочвалася столькі такой інфармацыі.
Калі ў Гомельскай вобласці разгарэлася «паляўнічая справа» супраць міліцыянтаў, былі праведзеныя ператрусы ў журналістак: Калінкінай, Коктыш, Радзінай, Халіп. Ператрусы праводзіліся паводле справы «абразы Івана Каржа».
У Гарадзенскай вобласці Іван Корж таксама адзначыўся. Падчас ягонага праўлення быў арыштаваны журналіст Анджэй Пачобут за «абразу» Аляксандра Лукашэнкі. Менавіта Гарадзенская ўправа КДБ ініцыявала працэс, у якім альбом «Прэс-фота» быў прызнаны экстрэмісцкім.
Цяпер Каржа адпраўляюць у парламент. Летась ягоныя даходы склалі 338 мільёнаў рублёў. Гэта значыць, што ў сярэднім за месяц ён атрымліваў 28 мільёнаў.
Супернікам Івана Каржа ў акрузе будзе пенсіянер міліцыі, сябра Аб'яднанай грамадзянскай партыі Уладзімір Няпомняшчы.
Яшчэ адзін супрацоўнік КДБ вылучаецца ў дэпутаты ў Менскай вобласці. У Бярэзінскай акрузе №61 кандыдатам зарэгістраваны намеснік начальніка ўправы КДБ Менску і Менскай вобласці Пётр Атрошчанка.
Ягоны даход летась склаў больш за 288 мільёнаў рублёў, гэта значыць, у сярэднім на месяц ён атрымліваў 24 мільёны рублёў.
Канкурэнты Атрошчанкі атрымлівалі летась не больш за 49 мільёнаў рублёў, гэта значыць, у сярэднім на месяц блізу 4 мільёнаў рублёў.
