Банку развіцця дазволілі пазычаць больш

Улады будуць абрастаць абавязкамі яшчэ хутчэй.

Ліміт эмісіі аблігацый Банка развіцця Беларусі на 2016 год павялічаны на 22% - да 317,4 млн руб.

Адпаведнае рашэнне замацавана ў сумеснай пастанове Савета міністраў і Нацыянальнага банка №686/22 ад 29 жніўня.

Як паведамляе прэс-служба ўрада, пастанова вызначае ліміт аб'ёму эмісіі аблігацый ААТ «Банк развіцця Рэспублікі Беларусь» на 2016 год у суме 317,4 млн руб. Папярэднім сумесным дакументам ад 9 лютага паказчык быў зафіксаваны на ўзроўні 260 млн (2,6 трлн недэмінаваных рублёў).

Таксама Савет міністраў пастановай №685 ад 29 жніўня зацвердзіў пералік крэдытаў, якія ўваходзяць у актывы «Белінвестбанка», выдадзеных рэспубліканскаму аб'яднанню «Белаграсэрвіс», паводле якіх ў 2016 годзе ажыццяўляецца саступка патрабаванням Банка развіцця Беларусі.

Пастанова ўвойдзе ў дзеянне з дня яе прыняцця.

Банк развіцця - спецыялізаваны фінансавы інстытут, створаны дзяржавай у адпаведнасці з указам прэзідэнта ад 21 чэрвеня 2011 года. Асноўныя задачы банка: фінансаванне праектаў, уключаных у дзяржаўныя праграмы; набыццё крэдытаў, выдадзеных іншымі банкамі на фінансаванне дзяржаўных праграм; льготная падтрымка айчыннага экспарту. Кантрольны пакет акцый Банка развіцця - 95,5% - належыць дзяржаве.