Маці закладнікаў будуць судзіць за цішоткі «Пуцін - кат Беслана»

Падчас жалобных мерапрыемстваў пяць жанчын знялі курткі і засталіся ў футболках з гэтым надпісам.

На удзельніц пратэстнай акцыі ў Беслане, затрыманых паліцыяй, складаюць адміністрацыйныя пратаколы паводле артыкула аб парушэнні парадку правядзення мітынгу.

Як паведамляе meduza.io жанчын абавязалі да канца дня 1 верасня з'явіцца ў суд.

Падчас жалобных мерапрыемстваў пяць жанчын знялі курткі, пад якімі былі надзетыя футболкі з надпісам «Пуцін - кат Беслана».

У акцыі ўдзельнічалі Эла Кясаева, Эма Бятрозава, Жанна Цірыхіна, Святлана Маргіева і Эмілія Бзарава. У чатырох з пяці жанчын пры захопе закладнікаў у школе загінулі дзеці.

Акрамя удзельніц акцыі, былі затрыманыя карэспандэнтка «Новай газеты» Алена Касцючэнка і карэспандэнтка інтэрнэт-выдання «Такие дела» Дыяна Хачатран. «Новая» апублікавала відэазапіс затрымання журналістаў.

Касцючэнку і Хачатран пасля адпусцілі з паліцыі. Са словаў карэспандэнткі «Новай газеты», адзін з паліцыянтаў «папрасіў прабачэння, але ў прыватным парадку».

Журналістаў затрымалі на той падставе, што ў Хачатран нібыта быў «фальшывы пашпарт», а Касцючэнцы выставілі «неналежнае захоўванне дакументаў».

Тэракт у Беслане быў учынены 1 верасня 2004 года. У школе былі захопленыя ў закладнікі 1128 чалавек. У выніку тэракту загінулі 334 чалавекі, у тым ліку 186 дзяцей.

Для вызвалення закладнікаў быў арганізавалі штурм школы. Расейскія ўлады сцвярджаюць, што штурм пачалі пасля таго, як тэрарысты сталі забіваць закладнікаў.

Падчас расследавання тэракту вылучалася версія аб ужыванні цяжкага ўзбраення падчас штурму, што пацягнула за сабой вялікую колькасць ахвяр. Афіцыйна гэтая версія не была пацверджаная.