Адно з найбуйнейшых прадпрыемстваў Баранавічаў перайшло на чатырохдзёнку

Заробкі рабочых БЗСП не дацягваюць нават да $150.

Са словаў супрацоўнікаў ААТ «Баранавіцкі завод станкапрыладаў», іх завод працуе шэсць гадзін на дзень чатыры дні на тыдзень.

Кіраўніцтва прадпрыемства адмовілася Intex-press каментаваць сітуацыю, бо дырэктар у камандзіроўцы, а акрамя яго адказваць на такія пытанні ніхто не бярэцца.

Са словаў супрацоўнікаў прадпрыемства, БЗСП перайшоў на скарочаны працоўны тыдзень 12 верасня і прапрацуе ў такім рэжыме да канца месяца. Цяпер завод працуе па шэсць гадзін на дзень чатыры дні на тыдзень.

Такі рэжым працы, са словаў працаўнікоў завода, выкліканы скарачэннем заказаў на прадпрыемстве як ад расейскіх прадпрыемстваў, так і ад МТЗ.

«Не жывём, а выжываем»

Такая сітуацыя адбіваецца ў тым ліку і на заробках працаўнікоў.

- Цяпер не жывецца, а хутчэй выжываецца. Заробкі не вялікія, а іншай працы ў горадзе няма, - прызнаўся Intex-press адзін з супрацоўнікаў заводу станкапрыладаў. - За апошнія пяць гадоў я заробку 500 рублёў нават у вочы не бачыў!

Паводле ягоных слоў, некаторыя рабочыя атрымліваюць і зусім 230-290 рублёў.

Нягледзячы на гэта, частка работнікаў завода глядзяць у будучыню з аптымізмам. Адзін з іх паведаміў, што нядаўна прадпрыемства наведвалі дэлегацыі з Расеі і Польшчы. З імі завод вядзе перамовы аб размяшчэнні сваіх заказаў. Гэта дае суразмоўцу надзею на тое, што ў будучыні справы «БЗСП» пойдуць добра. Ён верыць, што кіраўніцтва настроенае на развязанне праблем прадпрыемства, і робіць для гэтага ўсё магчымае.

Супрацоўнікі прадпрыемства адзначаюць, што за апошні час БЗСП удалося выйсці на прыбытковую працу. Паводле вынікаў першага паўгоддзя прадпрыемству ўдалося павысіць тэмпы вытворчасці - паведамілі на пасяджэнні Баранавіцкага гарвыканкама 26 жніўня.

Няпоўная тыдзень - перыядычная з'ява

Нагадаем, што цягам больш года завод перыядычна скарачае працоўны тыдзень. У ліпені 2015 года БЗСП і зусім адпраўляў сваіх супрацоўнікаў у вымушаныя адпачынкі з захаваннем дзвюх трацінаў ад акладу.

Паводле вынікаў дзевяці месяцаў 2015 года БЗСП стаў трэцім сярод самых стратных ААТ горада. Таксама трэцімі сярод фінансавых аўтсайдэраў Баранавічаў яны сталі і паводле вынікаў 2015 года агулам, спрацаваўшы са стратамі ў 6,7 млрд рублёў.

Але ў 2016 годзе БЗСП змрг выйсці з гэтага сумнага рэйтынгу, бо за першыя тры месяцы года заводу ўдалося спрацаваць з прыбыткам.

Прычынай складанага фінансавага становішча, як і на іншых машынабудаўнічых прадпрыемствах горада і краіны, стала зніжэнне попыту на прадукцыю, выкліканае памяншэннем заказаў ад расейскіх і айчынных заводаў.