Кіраўніка УАЗ затрымалі ў прыбіральні на канферэнцыі Расейскага футбольнага саюза
9- 24.09.2016, 12:29
- 6,306
Паліцыянты затрымалі кіраўніка Усерасейскага аб'яднання заўзятараў (УАЗ) Аляксандра Шпрыгіна.
Кіраўнік УАЗ прыйшоў на канферэнцыю Расейскага футбольнага саюза (РФС), паведамляе карэспандэнт ТАСС.
Канферэнцыя праходзіць у гатэлі Holiday Inn у Лагунцах. Затрыманне адбылося ў прыбіральні гатэля. Паліцыянты былі ў масках.
Пазней "Інтэрфакс" паведаміў, што двое супрацоўнікаў АМАПа ў балаклавах вывелі Шпрыгіна з будынка на вуліцу.
На канферэнцыі ў суботу будуць абмяркоўваць пытанне аб выключэнні УАЗ са складу РФС.
Летам расейскія фанаты бралі ўдзел у вулічных беспарадках у Марсэлі перад матчам групавога турніру чэмпіянату Еўропы паміж камандамі Англіі і Расеі. 20 чалавек, у тым ліку Шпрыгін, былі выдвараны з Францыі, а трое расейцаў былі прысуджаныя да турэмных тэрмінаў ад аднаго да двух гадоў.
УАЗ было створана ў 2007 годзе пры садзейнічанні дзейнага кіраўніка РФС Віталя Мутко, нягледзячы на супрацьдзеянне праекту з боку праваахоўных органаў. Прычынай таму з'явілася неадназначная рэпутацыя фанацкага руху ў Расеі, які ўключае ў сябе групоўкі футбольных хуліганаў.
Пасля боек у Марсэлі Мутко абяцаў звольніць кіраўніцтва УАЗ і выключыць адыёзную арганізацыю са складу Расейскага футбольнага саюза.
На канферэнцыі ў Лагунцах выбіраюць новага кіраўніка РФС. Двое прэтэндэнтаў знялі свае кандыдатуры на карысць Мутко. З ім за абранне на гэту пасаду змагаецца вядомы трэнер Валерый Газаеў.