Дэлегацыя Таджыкістана збегла з нарады АБСЕ ў Варшаве праз прысутнасць апазіцыі

Таджыцкая апазіцыя атрымала магчымасць выступіць на канферэнцыі АБСЕ і правяла акцыю з патрабаваннем вызваліць палітвязняў.

Афіцыйная таджыцкая дэлегацыя заявіла, што пакідае Нараду АБСЕ аб чалавечым вымярэнні ў Варшаве дзеля ўдзелу ў ім прадстаўнікоў забароненай Партыі ісламскага адраджэння Таджыкістана (ПІАТ) ды іншых асоб, «якія ўчынілі злачынствы ў Таджыкістане». Пра гэта гаворыцца ў заяве таджыцкай дэлегацыі, апублікаванай на сайце АБСЕ, паведамляе ІА «Фергана».

«Дэлегацыя Таджыкістана спакойна і талерантна ўспрыняла прысутнасць шэрагу ўдзельнікаў гэтай акцыі, нягледзячы на тое, што яны ўчынілі небяспечныя і асабліва небяспечныя злачынствы, а таксама тэракты і знаходзяцца ў вышуку, у тым ліку ў міжнародным вышуку. Дэлегацыя таксама памяркоўна ставілася да ўсякіх нападак і шантажу як падчас імпрэзы, так і за яе межамі. Але ўчора яны перайшлі чырвоную рысу, і мы былі вымушаныя рэагаваць на падзеі», - гаворыцца ў заяве.

У рамках Нарады АБСЕ ў Варшаве на сэсіі, прысвечанай сітуацыі з правамі чалавека ў Таджыкістане, прадстаўнікі пазасістэмнай таджыцкай апазіцыі, у тым ліку сябры ПІАТ і «Групы-24», атрымалі магчымасць выступіць і правесці акцыю з патрабаваннем вызваліць палітвязняў у краіне. У адказ на прысутнасць апазіцыі на дзеі АБСЕ ў Душанбэ прайшлі пратэставыя студэнцкія акцыі, арганізаваныя актывістамі праўрадавага моладзевага руху «Авангард».

У той жа час Human Rights Watch заявіла аб тым, што пасля акцыі актывістаў апазіцыі ў Таджыкістане блізу 50 іхніх сваякоў былі затрыманыя і падпалі пад ціск з боку ўлады. Яны былі дапытаныя супрацоўнікамі дзяржбяспекі. 22 верасня ў Худжандзе і Кулябе побач з дамамі апазіцыйных дзеячаў Ілхамджона Якубава і Шабнам Худайдодавай сабраліся тутэйшыя жыхары, якія выкрыквалі «ворагі народа, тэрарысты і здраднікі». Некалькі дэманстрантаў паспрабавалі праткнуцца ў дом Якубава і збіць ягоную маці. У Кулябе больш за сто тутэйшых жыхароў сабраліся каля дома Шабнам Худайдодавай. Школьныя настаўнікі, студэнты і мясцовыя рэлігійныя дзеячы крычалі, што жанчына з'яўляецца ворагам народа, і патрабавалі, каб яна спыніла крытыку прэзідэнта Рахмона. Ейную 9-гадовую дачку выгналі са школы. Відавочцы паведамляюць, што натоўп збіў дзяўчынку, у выніку чаго яна атрымала траўмы.

Нагадаем, у сярэдзіне верасня 2015 года ўлады Таджыкістана абвінавацілі кіраўніцтва ПІАТ ў дачыненні да спробы вайсковага бунту былога намесніка міністра абароны краіны Абдухаліма Назарзода. Партыя была абвешчаная тэрарыстычнай арганізацыяй, чальцы яе кіроўнага складу арыштаваныя і асуджаныя.

Лідар ПІАТ Мухідын Кабір, які эміграваў з Таджыкістана яшчэ ў сакавіку 2015 года, баючыся крымінальнага пераследу, і жыве за мяжой, адхіляе ўсе абвінавачванні супраць сваёй партыі, мяркуючы, што вераснёўскі бунт быў падставай для таго, каб забараніць у краіне дзейнасць партыі.