Дзяўчыны ў вясельных строях праедуць на роварах па Пінску
5- 26.09.2016, 9:26
- 10,125
У Пінску 1-кастрычніка адбудзецца гарадскі прабег «Нявеста на веласіпедзе».
Пра гэта паведаміла БелТА начальніца аддзела ідэалагічнай работы, культуры і спраў моладзі гарвыканкама Валянціна Кулак.
Мерапрыемства пройдзе ў асноўны дзень свята горада. У велапрабегу могуць удзельнічаць мясцовыя жыхаркі ва ўзросце ад 16 гадоў і старэй. Яны абавязаны выконваць дрэс-код, які ўключае крэатыўны вясельны ўбор, прычоску і абутак на абцасах. Акрамя таго, канкурсанткам прапанавана стыльна аформіць свой двухколавы транспарт.
Старт намечаны з пляцоўкі ад палаца Бутрымовіча, дзе размяшчаецца ЗАГС. Мясцовыя жыхаркі праедуць на роварах па вуліцы Леніна. Даўжыня маршруту невялікая, але сімвалічная - 919 м. Менавіта столькі гадоў спаўняецца Пінску сёлета.
Фінішуюць «нявесты» на цэнтральнай плошчы. На галоўнай сцэне яны прадставяць журы і гледачам свае вобразы. Касцюмы ўдзельніц будуць ацэньвацца ў пяці намінацыях: нацыянальны, рэтра, сучасны, класічны стыль і «фэнтэзі». Пераможцаў чакаюць памятныя прызы ад арганізатараў.
«Велапрабег у нас пройдзе ўжо другім разам. Летась дзяўчыны пастараліся, праявілі крэатыўнасць. Гараджане ўтварылі ўздоўж дарогі калідор, і горача іх віталі. Спадзяемся, што гэтым разам конкурс збярэ яшчэ больш чароўных веласіпедыстак», - адзначыла Валянціна Кулак.
Адзначаць 919-годдзе роднага горада пінчукі будуць некалькі дзён. Асноўныя святочныя мерапрыемствы пройдуць 1 і 2 кастрычніка.