Фірмы Пефціева выяўленыя ў Багамскіх афшорах

Ценявы бізнэс беларускага алігарха знайшлі журналісты-следчыя.

У новай базе Міжнароднага кансорцыума журналістаў-следчых (ICIJ) па бізнэсу, якія зарэгістраваныя на Багамскіх выспах, прысутнічаюць тры кампаніі, звязаныя з беларускім алігархам Уладзімірам Пефціевым, піша Заўтра тваёй краіны.

Як паведамляе медыяпартнёр ICIJ, выданне Times of Malta, Уладзімір Пефціеў названы дырэктарам трох Багамскіх афшораў - Investment Management Group (у 1997-2005 гадах), NTA (1997-2003) і VVK Investments (1997-2011). Адзначаецца, што партнёр Уладзіміра Пефціева Вольга Макарава дагэтуль з'яўляецца кіраўніком VVK Investments.

Замена дырэктара, хутчэй за ўсё, звязана з увядзеннем Еўразвязам санкцый супраць алігарха і яго кампаній у 2011 годзе.

У апублікаваным ICIJ вясной гэтага года «Панамскім спісе» Вольга Макарава названая акцыянерам і бенефіцыярам паўтара дзесятка кампаній, створаных у афшора Сейшэльскіх і Брытанскіх Віргінскіх выспаў у перыяд з 2007 да 2013 года. Гэта значыць - і ў перыяд знаходжання Уладзіміра Пефціева і яго бізнэсу пад санкцыямі Еўразвязу. Між іншым, яна названа ўладальніцай кампаній Barchetta Ltd, Maestrale Ltd, Stenmore Management Limited, Segal Investment Limited, Cardel Group Inc, Rocchetta Ltd, Sfera Ltd, Strathford Holding Ltd, Cadwall International SA, Milden Holdings, Sarles Investments, Kelly Bay Pacific Overseas Co., Isely Investments Ltd, Unifin Consultancy Limited.

«Багамскія спіс», як паведамляе ICIJ, не такі падрабязны, як «Панамскі спіс». Але гэта таксама цікавая база, якая ўтрымлівае 1,3 млн файлаў па 175 тыс. кампаній, зарэгістраваных на Багамскіх выспах у перыяд з 1990 да 2016 года (уцечка «Панамскага спісу» склала 11,5 млн дакументаў). У дакументах пералічваюцца час стварэння кампаній, іх юрыдычныя і паштовыя адрасы, у некаторых выпадках - дырэктары і ўладальнікі кампаній. Доступ да базы платны і складае 10 даляраў за пошук.

У «Багамскім спісе» ўжо выявіліся кампаніі, звязаныя з былым камісарам Еўразвязу ў канкурэнцыі, былым міністрам калумбійскага Міністэрства энэргетыкі і іншымі чыноўнікамі многіх краін свету.