У ААЭ таксіст вярнуў бізнэсоўцу забытыя ў машыне паўмільёна даляраў
10- 26.09.2016, 10:36
- 14,373
Таксіст Насібала Шыр, адвозячы паўднёвакарэйскага бізнэсоўца, выявіў на заднім крэсле торбу з велізарнай сумай грошай.
Пра гэта паведамляе газета «Сегодня» са спасылкай на Sharjah24.
Як паведамляе выданне, пасля таго, як ён адвёз з аэрапорта бізнэсоўца, выявіў у сябе ў машыне торбу, якую той забыўся. Калі ўбачыў, што там аказалася больш за 1,7 млн дырхамаў (500 тысяч даляраў), а таксама дакументы, ён адразу звярнуўся ў паліцыю. Шыр адвёз знаходку ў паліцэйскі пастарунак аэрапорта.
Пасля гэтага паліцыя даволі аператыўна знайшла ўладальніка сумкі і вярнула яму яго ўласнасць.
Варта адзначыць, што транспартнае ўпраўленне Шарджы ўзнагародзіла Шыра прэміяй за сумленнасць і стварэнне добрай рэпутацыі аўтаперавозчыкаў. Той заявіў, што ўважае свой учынак звычайным і заўсёды вяртае забытыя пасажырамі рэчы.