У цэнтры Менска вуліцам вярнулі іх гістарычныя назвы
9- 26.09.2016, 11:40
- 14,379
На вуліцах Верхняга горада ў сталіцы з'явіліся таблічкі з указаннямі іх ранейшых назваў.
На пачатку вуліц Інтэрнацыянальная, Энгельса, Герцэна, Кірылы і Мяфодзія, Зыбіцкая, Музычны завулак побач з назвамі вуліц ўстаноўленыя дублюючыя паказальнікі з пералікам іх ранейшых найменняў, названыя ў храналагічным парадку.
Пра гэта сайту charter97.org паведамілі ў прэс-службе ГА «Альтэрнатыва».
У 2015 годзе актывісты сабралі некалькі тысяч подпісаў пад зваротам да сталічных уладаў і Міністэрства культуры з прапановай размясціць на 16 вуліцах, 2 праспектах і 2 плошчах у цэнтры Менска дублюючыя таблічкі з указаннямі іх ранейшых назваў.
Як вынік, чыноўнікі ідэю падтрымалі і паабяцалі да канца 2016 года ўвасобіць яе ў жыццё. Ініцыятыва знайшла падтрымку і ў Міністэрстве культуры.
«Прапанова, выкладзеная ў звароце, годная ўвагі і падтрымкі ў рамках кампетэнцыі Міністэрства культуры», - гаворыцца ў адказе намесніка Міністра Аляксандра Яцко.
«Мы рады, што сталічныя ўлады ўхвалілі ідэю і знайшлі сродкі для яе паэтапнай рэалізацыі. Упэўненыя, што ўсталяваныя таблічкі ў гістарычным цэнтры беларускай сталіцы будуць садзейнічаць вяртанню гораду яго гістарычнага аблічча, падкрэсліваць нашу старажытную гісторыю і культуру, а таксама ўсе гэта станоўча адаб'ецца на турыстычнай прывабнасці Менска», - каментуе лідар «Альтэрнатывы» Алег Корбан.