Бацькі: Чаму ў кабінетах чыноўнікаў добрыя вокны, а ў дзіцячых садках - жудлівая парахня?

Непрыемнае і нечаканае адкрыццё зрабіў для сябе малады бацька, які наважыў дапамагчы выхавальнікам з уцяпленнем вокнаў у дзіцячым садзе.

Пасля працы мужчына прыйшоў у групу, дзе праводзіць дзённы час ягонае дзіця, і рашуча ўзяўся за працу. Аднак ужо першыя спробы ўцяпліць неўцяпляльнае выклікалі ў яго масу рытарычных пытанняў, паведамляе onliner.by.

- Адразу скажу, што ў «чалавечым вымярэнні» садок у нас проста выдатны - выдатныя педагогі, загадчыца, якая хвалюецца за дзяцей і гаспадарчую частку. Сярод бацькоў даўно сфармавалася ўстойлівае перакананне - лепш аддаць дзіця менавіта ў гэты (хай і бедны) садок, чым весці ў модны і сучасны: пра ўсіх дзецей тут сапраўды клапоцяцца, - распавядае карыстальнік форуму пад нікам veteran 45. - Менавіта таму называць нумар саду я не хачу. Ведаю, што ў нас прынцып просты: вінаваты-не вінаваты - усё адно пакараюць (а чаго добрага яшчэ і звольняць) кіраўніка.

І вось перад халадамі запрасілі нас узяць удзел у штогадовым мерапрыемстве - уцяпленні вокнаў. Мы, бацькі, купілі стужку, у адзін з дзён прыйшлі працаваць і жахнуліся стану вокнаў. У рамах шчыліны, яны трымаюцца на фарбе, дрэва гнілое, адна трухліна. Некаторыя створкі наогул могуць выпасці. І гэта пры тым, што на вуліцы дзіцячыя гульнявыя пляцоўкі размешчаныя наўпрост пад вокнамі. То бок, гэта небяспечна не толькі для здароўя, але і для жыцця дзяцей.

Тэмпература ў спальным памяшканні блізу 15 градусаў, хіба такое дапушчальна? Самае цікавае, што садок падшэфны - курыруе яго бюджэтная арганізацыя. Са словаў загадчыцы, за гэты год дапамогі ад шэфаў паступіла 2 мільёны яшчэ недамінаваных рублёў. Гэта ж літаральна на пару змяшальнікаў, пра якую замену вокнаў можна казаць.

Мы, бацькі, рэгулярна скідваемся і робім касметычны рамонт у групах, але завесці гаворку пра замену вокнаў за наш кошт у загадчыцы проста язык не паварочваецца. Як яна сама прызнаецца: ідэальны варыянт быў бы змяніць арганізацыю-куратара, але гэта пакуль не дазваляюць зрабіць. Пытаецца, чаму? У нас у Савецкім раёне 37 дзіцячых садоў і 28 моцных, добрых арганізацый. Можна было б знайсці спонсара, які мог кожны год мяняць вокны хоць бы ў адной групе ўзамен на падатковыя льготы.

Гляджу я на гэтыя вокны і разумею - гэта проста жах. Суцэльная гнілата, пафарбаваная белай фарбай. І ў такім стане тры вокны з чатырох, прычым сітуацыя аднолькавая ва ўсіх групах. А ў гэты час у кабінетах чыноўнікаў спрэс новыя, непрадуваныя вокны. Хіба гэта справядліва?