«Бясплатная» медыцына: у Віцебску стала складана зрабіць флюараграфію

У Віцебску, каб зрабіць флюараграфію, трэба стаяць на вуліцы ў чарзе.

Сёння ў Віцебску стала сапраўднай праблемай зрабіць флюараграфію. У паліклініцы №4 зламаўся апарат. Такая сітуацыя склалася і ў паліклініцы №3, дзе наогул немагчыма зрабіць даследаванне лёгкіх. На кабінеце кароткі надпіс: апарат не працуе.

Што адбылося? Высвятляла газета «Віцебскі кур'ер».

З гэтым пытаннем мы звярнуліся да Леаніда Маскіна, загадчыку паліклінікай №4.

- Апарат зламаўся яшчэ ў ліпені, - растлумачыў Леанід Анатольевіч, - выйшла з ладу трубка. А паколькі абсталяванне ў нас італійскае, то новую дэталь замовілі за мяжой. Кожны дзень на рэнтген-даследаванне прыходзіць амаль 200 чалавек, вось апараты і выходзяць з ладу. А кошт гэтай трубкі амаль 28 тысяч на новыя грошы. Пакуль знайшлі сродкі, пакуль замовілі патрэбную дэталь... Спадзяемся, што ўжо найбліжэйшы месяц зможам абслугоўваць людзей у звычайным кабінеце. Цяпер карыстаемся перасоўным пульмаэкспрэсам.

Ля аўтобуса з рэнтгенам чарга ў сераду раніцай невялікая. Тыя, хто прыйшоў, распавядаюць, што раз на раз не пападае. Так, у панядзелак тут быў сапраўдны ажыятаж. Узяць талон на флюараграфію ў паліклініцы не праблема, са слоў пацыентаў. Праблема ў іншым: чакаць сваёй чаргі даводзіцца на вуліцы, дзе надвор'е ўжо не такое і цёплае. І людзі стаяць на дварэ і ў дождж, і ў вецер. А бо яшчэ ў вагончыку, каб зрабіць рэнтген, даводзіцца распрануцца. Ды і ў чарзе шмат паджылых і хворых людзей. Як ім стаяць, да прыкладу, пад дажджом?

Зрэшты, і ўлетку адстаяць на вуліцы чаргу было даволі складана.

- Праходзіў летам, таксама ў гэтай машыне, і спякота была жудасная, прытомнасць, праўда, не страчвалі, але таксама было не салодка. Так што ад пары года нічога не мяняецца, - скардзіцца ў сацыяльных сетках карыстальнік Ігар Сяргеевіч.

А цяпер ужо восень, не за гарамі і зімовыя халады. Я стаяць на дварэ чалавеку хвораму?

- Я з дачкой рабіла флюараграфію, - дзеліцца ў сацыяльных сетках Ганна, - мелася падазрэнне на запаленне лёгкіх, і мы ў чарзе амаль гадзіну былі.

Віцябчукі даюць адзін аднаму парады, дзе цяпер лепш прайсці флюараграфію платна і без чаргі. Хтосьці прапануе адправіцца ў абласны шпіталь, хтосьці ў абласны сухотны дыспансер ці ж дыягнастычны цэнтр. Там хаця б не трэба будзе сядзець на дварэ. Зрэшты, не кожнаму па кішэні праходжанне платнага абследавання:

- Зламаўся апарат. Рамонт далёка не танны. Бюджэт скарочаны на мінімум, - піша Наталля. - Лекарам, медсёстрам і санітаркам сабрацца? Або скаржнікі аплацяць? Платны варыянт бабулькі са сваімі пенсіямі і не пацягнуць.

Платнае абследаванне не гарантуе пазачарговае праходжанне рэнтгена. Чакаць даводзіцца ўсім.

- Мне яшчэ і нагрубіла з гэтай нагоды: хацелі за 2 рублі яшчэ і без чаргі? - абураецца Анастасія.

А ў паліклініцы №3 на Маскоўскім праспекце няма і спецыяльнага аўтобуса, дзе робяць флюараграфію. Тут зламаўся апарат, са слоў медыцынскіх работнікаў, ужо тыдзень таму. Хочаце прайсці флюараграфію? Звяртайцеся да спецыялістаў у іншыя медыцынскія ўстановы. Платнае даследаванне лёгкіх у Віцебску каштуе 1 рубель 70 капеек. З сабой трэба ўзяць пашпарт. І пакуль праблему з апаратам тут не развязалі.