Сёння - дзень нараджэння Кастуся Каліноўскага
12- 2.02.2024, 9:41
- 3,888
![Сёння - дзень нараджэння Кастуся Каліноўскага](https://i.c97.org/ai/356486/aux-head-1574432855-20191122_action_kalinouski_svaboda_360.jpg)
Нацыянальны герой Беларусі з'явіўся на свет 2 лютага 1838 года.
Бацькам Кастуся Каліноўскага быў беззямельны шляхціц з Гародні, уладальнік невялікай ткацкай мануфактуры Сямён Каліноўскі. Маці, Вераніка Рыбінская, памерла, калі сыну было 5 гадоў.
Будучы лідар паўстанцаў нарадзіўся ў маёнтку Мастаўляны на Гарадзеншчыне 2 лютага 1838 года.
У 1856-1860 гадах, пасля заканчэння Свіслацкай гімназіі, ён вучыўся на юрыдычным факультэце Пецярбуржскага ўніверсітэта. У студэнцкія гады разам са старэйшым братам Віктарам актыўна ўдзельнічаў у дзейнасці студэнцкіх рэвалюцыйных гурткоў.
![](https://i.c97.org/ai/581901/aux-1706856002-aux-1643781963-aux-1612247395-photo_2021-02-02_04-15-11.jpeg)
Адразу пасля вяртання на радзіму ў 1861 годзе, Каліноўскі разам са сваімі паплечнікамі стварыў рэвалюцыйныя гурткі ў Гарадзенскай і Віленскай губернях, якія ўвайшлі ў адзіную канспіратыўную арганізацыю.
У 1862 ён стаў на чале камітэта руху, які пазней стаў Літоўскім правінцыйным камітэтам паўстання.
У 1862-1863 кіраваў выданнем і распаўсюдам «Мужыцкай праўды» - першай нелегальнай рэвалюцыйнай газеты на беларускай мове.
Узначаліўшы ў 1863 паўстанне супраць расейскіх уладаў у Беларусі і Літве, Каліноўскі выступіў за шырокае далучэнне да барацьбы сялян, за распаўсюд паўстання на ўсход і на поўнач - на тэрыторыю Расеі.
Пры тым, што ён разглядаў за патрэбнае шчыльнае супрацоўніцтва з паўстанцамі ў Польшчы, Каліноўскі паслядоўна заклікаў да незалежнасці Беларусі і Літвы. «Кастусь Каліноўскі з настроем герцэнаўскай школы на чале славалюбных асоб з чырвоных ліцвінаў настойліва праводзіў ідэю аб самастойнасці Літвы», - пісалі аб ім у данясеннях віленскаму генерал-губернатару.
![](https://i.c97.org/ai/581901/aux-1706856002-aux-1643781963-aux-1612247395-photo_2021-02-02_04-15-11 (2).jpeg)
Ва ўмовах жорсткіх дзеянняў урадавых сіл, знаходзячыся ў глыбокім падполлі, Каліноўскі кіраваў паўстанцамі да свайго арышту ў канцы студзеня 1864 года.
Асуджаны на смерць, Каліноўскі працягваў барацьбу, звяртаючыся да народа з «Лістамi з-пад шыбеніцы».
У іх ён заклікаў не прызнаваць расейскую ўладу і ваяваць «за свайго Бога, за сваё права, ... за сваю Радзіму».
Кастуся Каліноўскага пакаралі смерцю ў Вільні ў 1864 годзе.
22 лістапада 2019 года тысячы беларусаў узялі ўдзел ва ўрачыстай цырымоніі перапахавання Кастуся Каліноўскага і яго паплечнікаў у Вільні.
![](https://i.c97.org/ai/581901/aux-1706856002-aux-1643781963-aux-1612247592-275989-1574428659-big.jpeg)
![](https://i.c97.org/ai/581901/aux-1706856002-aux-1643781963-aux-1612247592-275986-1574425972-big.jpeg)
![](https://i.c97.org/ai/581901/aux-1706856002-aux-1643781963-aux-1612247592-275983-1574424899-big.jpeg)