Андрэй Саннікаў: Расейцам трэба з'язджаць з краіны

Найлепшае выйсце з сітуацыі, якая склалася — уступаць у добраахвотніцкія падраздзяленні.

Ці прызнае Захад выбары Пуціна і ці чакаць у Расеі пратэстных акцый? Такое пытанне Telegram-канал "Баста!" задаў экс-кандыдату ў прэзідэнты, лідару грамадзянскай кампаніі "Еўрапейская Беларусь" Андрэю Саннікаву:

- Пытанне наогул так не стаіць. Гэтае дзейства, якое адбылося ў нядзелю, нават блізка не падобнае да выбараў. Таму Захад павінен выказацца дакладна, што выбараў у Расеі няма, няма выбараў у Беларусі. Гэта дзве абсалютна аднолькавыя сістэмы, дзе людзі пазбаўленыя выбараў. Таму чакаць, што нейкія перамены могуць прайсці ў сувязі з выбарачным фарсам, проста не даводзіцца.

Самае непрыемнае, што можа быць, гэта тое, што Захад пачне шукаць нейкія апраўданні для таго, каб паціху гэтыя выбары прызнаць. Але гэта прывядзе толькі да ўзмацнення пагрозы самому Захаду з боку Расеі, будзе скарыстаная тэрыторыя і рэжым Лукашэнкі. Бо вайна ідзе не супраць Украіны, а супраць Захаду агулам. Пуцін сам пра гэта гаворыць.

Ніякіх пратэстных акцый у Расеі чакаць не даводзіцца. У Расеі зараз пачнецца “лукашэнкаўшчына”, гэта значыць зараз будуць вызначаць тых, хто стаялі ў чэргах, падпісваліся за Надзеждзіна, выказваліся неяк не так, як падабаецца крамлёўскаму кіраўніку. Цяпер ён сябе пераназначыў.

У яго ёсць пяць гадоў, і ён будзе павольна і дакладна разбірацца з усімі, нават дробнымі апанентамі, што робіць сёння ў Беларусі Лукашэнка. Гэта паказчык страху і ў аднаго дыктатара, і ў другога. Бо толькі страх падштурхоўвае да таго, каб кожны дзень былі нейкія ахвяры, каб паказаць самому сабе, што ты кантралюеш сітуацыю. Не, не кантралюеш.

У расейцаў самае добрае выйсце - з'язджаць з Расеі, лепш за ўсё ва - Украіну, станавіцца добраахвотнікамі і ваяваць з гэтым рэжымам. Гэты рэжым не расейскі. Гэта рэжым злачынцаў Лукашэнкі і Пуціна, якія проста ажыццяўляюць свае брудныя мэты, нягледзячы на людскія ахвяры, нягледзячы на тое, што ўвялі свае краіны ў такую прорву. Напэўна, ніводная сітуацыя ні ў адной дыктатарскай краіне не параўнаецца з сённяшняй Расеяй і Беларуссю.