Пад Варшавай кіроўцы затрымалі п'янага беларуса

Іх напалохала, як грузавік едзе па трасе.

Пад Варшавай кіроўцы зрабілі цывільнае затрыманне беларуса. Яго стыль кіравання здаўся відавочцам дзіўным. Паліцыя, якая прыбыла, зафіксавала ў мужчыны больш чым 2,5 праміле алкаголю ў арганізме, паведамляе MOST са спасылкай на паліцыю.

Інцыдэнт адбыўся ў пятніцу, 15 сакавіка, недалёка ад Валоміна - горада пад Варшавай. На трасе ў кірунку Беластока аказалася супрацоўніца аддзела ў барацьбе з эканамічнымі злачынствамі Варшаўскай паліцыі. У той момант яна была не пры выкананні і ехала на прыватным аўтамабілі.

Ля вёскі Зялёнкі яна звярнула ўвагу на грузавік, які пятляў па трасе. Жанчына звязалася з паліцыяй, а сама рушыла ўслед за аўтамабілем, чакаючы зручнага моманту, калі кіроўцу можна будзе спыніць.

Неўзабаве ля вёскі Эмільянава грузавік збочыў на паркоўку, і жанчына тут жа падышла да кіроўцы. Ад яго даносіўся моцны пах алкаголю. Яна і яшчэ адзін відавочца пастанавілі затрымаць кіроўцу да прыбыцця паліцыі. Каб парушальнік не мог уцячы, жанчына забрала ключ запальвання.

Паліцыянты, якія прыбылі на месца, высветлілі, што за стырном знаходзіўся 39-гадовы грамадзянін Беларусі. Тэст паказаў 2,5 праміле алкаголю ў выдыханым ім паветры. Калі мужчына працверазеў, яму выставілі абвінавачанне. Цяпер беларусу пагражае да двух гадоў пазбаўлення волі.