Стан здароўя Алеся Бяляцкага за кратамі пагоршыўся

Нобэлеўскаму лаўрэату не перадаюць неабходныя лекі.

Лаўрэат Нобэлеўскай прэміі міру, старшыня Праваабарончага цэнтру “Вясна” Алесь Бяляцкі ўжо 1 000 дзён знаходзіцца за кратамі.

Жонка палітвязня Наталля Пінчук распавяла Associated Press, што апошнія паўгода Бяляцкі знаходзіцца ў адзіночнай камеры, нягледзячы на свае хранічныя захворванні.

«Ад людзей, якія выйшлі з турмы, мне стала вядома, што стан Алеся працягвае пагаршацца і ён не атрымлівае пэўных лекаў, якія яму неабходныя», – сказала Пінчук.

Яна заклікала ААН "дзейнічаць больш актыўна", каб дапамагчы Бяляцкаму і іншым палітвязням у Беларусі.

Нагадаем, у сакавіку 2023 года лаўрэат Нобэлеўскай прэміі міру Алесь Бяляцкі, віцэ-прэзідэнт FIDH Валянцін Стэфановіч і юрыст "Вясны" Уладзімір Лабковіч паводле сфабрыкаваных абвінавачванняў былі прысуджаныя да 10, 9 і 7 гадоў пазбаўлення волі адпаведна.