Мянчук двойчы падмануў ашуканцаў

Першы раз ён вярнуў грошы ахвяры, другі — прагуляў усё з сябрамі на Зыбіцкай.

Крымінальную справу за махлярства ў буйным памеры распачалі ў дачыненні да двух менчукоў, якія падманулі і тэлефонных аферыстаў, і іх ахвяру. Падрабязнасці расказалі ў прэс-службе Следчага камітэта.

У чэрвені 2022 года 21-гадовы мянчук надумаў падпрацаваць кур'ерам у тэлефонных ашуканцаў. Прапанову аб працы ён знайшоў у тэматычнай групе ў Telegram. Хлопца адразу папярэдзілі, што дзейнасць незаконная, могуць быць "камандзіроўкі", але за ўсе гэтыя ўмовы належыць добры заробак 5% ад забраных у ашуканых беларусаў грошай. Жыхар сталіцы даслаў сваю фатаграфію з пашпартам у руках і стаў чакаць замову.

Згодна з матэрыяламі справы, 24 чэрвеня ён адправіўся па адрасе, які паведаміў куратар. Фігуранта папрасілі выконваць меры канспірацыі: надзець цёмнае адзенне і маску на твар, перад тым як зайсці ў пад'езд праверыць, што ў двары няма супрацоўнікаў міліцыі і заведзеных аўто. Паслухмяна выконваючы ўсе ўказанні, ён забраў у 82-гадовай жанчыны пакет з асабістымі рэчамі і грашыма.

Напярэдадні пенсіянерцы патэлефанавала "пляменніца", якая нібыта справакавала аварыю і прасіла матэрыяльнай дапамогі. Далей да размовы падключыўся псеўда-супрацоўнік праваахоўных органаў, які паведаміў, што для замірэння і шчаснага зыходу падзей тэрмінова патрэбна буйная сума. Паджылая мянчанка, паверыўшы атрыманай інфармацыі, адразу паведаміла пра ашчадак. Яна падрыхтавала асабістыя рэчы, пяць тысяч рублёў і тысячу даляраў, напісала неабходныя заявы і, не задаючы пытанняў, перадала “пасылку” кур'еру.

Хлопец "паведаміў" аб выкананым заданні куратару і па яго ўказанні абмяняў беларускія рублі на валюту. Далей малады чалавек павінен быў перадаць грошы пасярэдніку, аднак, спалохаўшыся прыцягнення да крымінальнай адказнасці, паехаў і вярнуў грошы пенсіянерцы. “Наймальнік” быў у лютасці, крычаў на хлопца і пагражаў, але якіх-небудзь наступстваў для яго не наступіла.

У той момант малады чалавек зразумеў, што можна падмануць ашуканцаў, забраўшы ў іх гроша. Жыхар сталіцы разумеў, што ашуканцы больш яму не давяраюць, таму рэалізаваць ідэю ён надумаў з дапамогай даўняга знаёмага. Абвінавачаны распавёў 21-гадоваму сябру прыдуманы план і ўжо праз некалькі хвілін яны звязаліся ўсё з тым жа “наймальнікам”.

Прайшоўшы працэдуру "рэгістрацыі", прыяцель адправіўся да 91-гадовага мужчыны па грошы. Ён забраў блізу трох тысяч даляраў, тысячу рублёў і 50 еўраў. Ужо разам хлопцы адправіліся ў гандлёвы цэнтр, дзе падзялілі ўсё паміж сабой і разышліся.

Кур'ер адправіўся з сябрамі ў рэстарацыю, потым кампанія арандавала саўну, каталася на самакатах, а да вечара яна была ўжо на вуліцы Зыбіцкай, дзе хлопцы наведвалі бары, пілі спіртное і палілі кальян. Фігурант шчодра аплачваў увесь адпачынак грашыма, якія некалькі гадзін таму забраў у мужчыны. Здабытыя супрацьпраўным шляхам грошы ён змарнаваў усяго за дзень.

Куратара хлопцы заблакавалі і да моманту затрымання былі ўпэўненыя, што застануцца беспакаранымі.

Дзеянні хлопцаў кваліфікаваны следчым паводле ч. 4 арт. 209 КК (Махлярства, учыненае ў асабліва буйным памеры, групай асоб).