Украінская Рада прагаласавала за мабілізацыю некаторых катэгорый асуджаных

Законапраект падтрымаў 281 дэпутат.

У сераду, 10 красавіка, Вярхоўная Рада Украіны ў першым чытанні прыняла законапраект № 11079-1, які прадугледжвае мабілізацыю асуджаных асоб.

Пра гэта паведаміла сустаршыня фракцыі "Еўрапейская Салідарнасць" Ірына Герашчанка, піша New Voice.

Паводле ейных слоў, прапануецца:

— унесці змены ў КК, якія датычацца ўмоўна-датэрміновага вызвалення асоб для іх удзелу ў ваеннай службе паводле кантракту і ўстанаўлення адказнасці за ўхіленне ад такой службы;

- унесці змены ў КПК, каб суд мог прымаць пастанову аб умоўна-датэрміновым вызваленні асоб для іх удзелу ў ваеннай службе паводле кантракту, а таксама звяртацца да выканання судовых пастаноў у гэтым пытанні;

- унесці змены ва УВК, каб урэгуляваць парадак умоўна-датэрміновага вызвалення ад пакарання асоб для іх удзелу ў ваеннай службе паводле кантракту;

- унесці змены ў закон аб адміністрацыйным наглядзе за асобамі, вызваленымі з месцаў пазбаўлення волі, каб камандзіры воінскіх часцей былі адказныя за адміністрацыйны нагляд за асобамі, якія ўмоўна-датэрмінова вызвалены для ваеннай службы паводле кантракту.

— унесці змены ў закон аб воінскім абавязку і вайсковай службе, каб устанавіць асаблівасці прыняцця, праходжання і звальнення з вайсковай службы асоб, умоўна-датэрмінова вызваленых для ваеннай службы паводле кантракту, а таксама развязаць пытанні іх сацыяльнай і прававой абароны.

Законапраект падтрымаў 281 дэпутат.