Аляксандр Хара: Нават план Трампа ставіць Пуціна перад сур'ёзнай праблемай

Украінскі дыпламат расказаў, чаму прапанова кандыдата ў прэзідэнты ЗША не спрацуе.

Кандыдат у прэзідэнты ЗША Дональд Трамп заяўляў аб намерах закончыць вайну Расеі супраць Украіны за 24 гадзіны.

Як гаворыцца ў публікацыі The Washington Post, знаёмыя з планам Трампа людзі кажуць, што той у прыватнай размове заявіў, што мог бы спыніць вайну Расеі супраць Украіны, ціснучы на Кіеў, каб ён адмовіўся ад пэўнай тэрыторыі - Крыма і Данбаса.

Пазней асяроддзе Трампа назвала гэтую публікацыю «фэйкам». Ці сапраўды план Трамп можа быць такім? Пра гэта і не толькі сайт Chаrter97.org пагаварыў з дыпламатам і экспэртам украінскага Цэнтра абаронных стратэгій Аляксандрам Харай:

- Варта сказаць, што падстаў для нейкіх мірных планаў пакуль што няма, паколькі Украіна не саступіла і не збіраецца саступаць. Тым больш абмяркоўваць здачу тэрыторый, бо гэта пытанне выжывання нацыі і ваенна-палітычнае пытанне. Не магу сабе ўявіць Зяленскага, які пагодзіцца на такія ўмовы. Што з ім будзе літаральна праз некалькі гадзін? Ну і, адпаведна, што мы бачым з расейскага боку - яны ўпэўненыя, што ў іх усё можа атрымацца, тым больш з прыходам Трампа, таму расейцы рыхтуюцца па максімуме выціснуць з гэтай сітуацыі.

Наконт плану ці нейкіх яго элементаў — падобныя ідэі ўжо былі. Я думаю, наўрад ці гэта можна назваць планам, паколькі ў самога Трампа падыход у дзеянні праз сваю харызму, спрабаваць сілай сваёй асобы паспрыяць, каб іншы бок пагадзіўся на яго ўмовы. Гэта добрая тэорыя, але на практыцы мы бачылі, калі ён быў прэзідэнтам, у яго гэта не атрымалася зусім з Кім Чэн Ынам. Нягледзячы на шматлікія сустрэчы і вялікія чаканні, яму не ўдалося вырашыць паўночнакарэйскую праблему з той простай прычыны, што дасведчаны дыктатар цудоўна разумее, у чым яго цікавасць.

Трампу хацелася ўвайсці ў гісторыю як чалавек, які развязаў глыбокую і старую праблему, таму Кім Чэн Ын дакладна не збіраўся свае інтарэсы здаваць. Тое самае можна сказаць і пра Пуціна. Як бы Трамп сабе не бачыў нейкія падыходы, адназначна, што гэта не будзе лёгка рэалізаваць. Тым больш, што пытанне ж не ў тэрыторыях, не ў Данецку, Луганску і Крыме, а ў жаданні Расеі знішчыць Украіну як краіну, кантраляваць тэрыторыю, а потым пачаць наступны этап заваёвы.

Мы гэта цудоўна разумеем, нашы сябры і партнёры і ў Штатах, і ў Еўропе гэта цудоўна разумеюць. Даць Пуціну магчымасць узаконіць нарабаванае і потым падрыхтавацца да наступнага этапу? Да гэтага ніхто не падрыхтаваны. Трамп прапануе пакінуць Расеі Данецк, Луганск і Крым. А як тады Пуціну развязаць праблему, што ён у канстытуцыю ўжо ўнёс Запарожскую і Хэрсонскую вобласці? Пуцін павінен сказаць: "Ну, вось, прабачце, будзем яшчэ раз мяняць канстытуцыю"? Я сабе не ўяўляю нават такога. Дапусцім, няма ва Украіны варыянтаў, мы ідзём на такое. Як гэта будзе з расейскага боку?

А самае галоўнае, што ні ўкраінскае грамадства, ні ўкраінскае кіраўніцтва не гатовыя на гэта. Украіна гатовая да ўсялякага развіцця падзей, магчымага перанясення вайны ў будучыню, калі ў нас не будзе дастаткова сродкаў і дапамогі нашых партнёраў, уласных сіл. Але тое, што мы павінны вярнуць захопленыя тэрыторыі, - гэта пытанне не толькі аднаўлення міжнароднага права, гэта пытанне выжывання Украіны.

Данецк, Луганск - таксама балюча, зразумела, што Украіна ад іх не адмовіцца, але без Крыму Украіна ўвесь час будзе ў небяспецы, а расейцы будуць пагражаць ўсёй краіне, пагражаць адрэзаць нас ад Чорнага мора і, адпаведна, вокавага свету. А з такой сітуацыяй мы не збіраемся згаджацца.

- У апошнія тыдні ў ЗША ў апытаннях у лідарах Джо Байдэн. Якія чыннікі могуць наўпрост паўплываць на рост або падзенне рэйтынгаў двух кандыдатаў у агляднай будучыні?

- Да моманту выбараў складана будзе прадказаць, хто стане прэзідэнтам, паколькі ёсць надзвычай вялікая колькасць чыннікаў.

Напрыклад, 7 кастрычніка мінулага года тэрарыстычны напад на Ізраіль і пачатак ізраільскай кампаніі знішчэння ХАМАС зменшылі падтрымку левага крыла дэмакратаў цяперашняй адміністрацыі ЗША, паколькі яны мяркуюць, што Амерыка павінна прымяніць усе свае сілы, каб спыніць кампанію ізраільскіх узброеных сіл на тэрыторыі сектара Газа.

Нехта кажа, што не будзе галасаваць ні за Трампа, ні за Байдэна. Натуральна, гэта азначае меншую электаральную базу, хаця гэта азначае і глупства людзей, якія так кажуць. Калі Трамп прыйдзе да ўлады, адназначна, што ім гэта яшчэ больш не спадабаецца, паколькі ён больш жорсткі прыхільнік падтрымкі Ізраіля і абсалютна нармальна можа ігнараваць гуманістычныя ці гуманітарныя моманты ў дачыненні да палестынцаў. Гэты чыннік тамака таксама ёсць.

Натуральна аднак ёсць і фактары канфліктаў у іншых частках свету. Тое, што адбываецца ў Чырвоным моры або ў Інда-Ціхаакіянскім рэгіёне. Рост напружання і адпаведная рэакцыя амерыканцаў таксама могуць паўплываць на вынікі выбараў.

Наступны фактар - гэта старыя праблемы, пытанні мяжы. Праблема міграцыйнай палітыкі сапраўды вострая, былі спробы націснуць на адміністрацыю Байдэна. Вы памятаеце, практычна чатыры месяцы былі перамовы паміж сэнатарамі-рэспубліканцамі і дэмакратамі аб пакеце дапамогі Украіне, Ізраілю і Тайваню, там было яшчэ і пытанне развязання сітуацыі на мяжы. Але Трампу гэта не спадабалася, ён захацеў вастрыню пытання не здымаць да выбараў, яны тарпедавалі гэта.

На днях следчы камітэт апублікаваў інфармацыю, нібыта кампанія Burisma, у якой браў удзел і сын Байдэна, датычная да фінансавання тэрарызму. Зразумелая справа, што гэта высмактана з пальца, ужо даказана, што ніякіх хабараў гэтая кампанія не плаціла Хантэру Байдэну. Адназначна, што гэта будзе раскручанае прыхільнікамі Трампа, гэта таксама можа быць нейкім чыннікам. Інфармацыйныя кампаніі, прапаганда, гэта тыя рэчы, якія дастаткова моцна ўплываюць на настроі людзей.

Ёсць яшчэ і эканамічныя моманты - магчымы скачок коштаў энэргарэсурсаў, падаражэе бензін на запраўцы для звычайнага амерыканца, гэта таксама можа паўплываць. Таму ёсць мноства чыннікаў, якія непасрэдна залежаць ад Байдэна і тых падзей, якія рэспубліканцы могуць выкарыстоўваць.

Ніхто не касаваў судовыя справы супраць Трампа. Адна адвалілася пасля ўнясення яго ў бюлетэні, то бок Вярхоўны суд даў сваю выснову. Але там ёсць і іншыя. Напрыклад, справа, звязаная з беспарадкамі на Капіталійскім узгорку, яна можа яшчэ стрэліць.

Адназначна, чым бліжэй лістапад, калі ўсе будуць галасаваць, тым больш кампрамату, прапаганды, адкрытай хлусні, маніпулятыўнай інфармацыі будзе з’яўляцца. Два бакі будуць спрабаваць мабілізаваць свой электарат, таму зараз яшчэ рана казаць, што адзін ці іншы кандыдат можа гарантавана перамагчы.