УСУ паказалі відэа працы на баявых браняваных машынах AMX-10 RC

AMX называюць «колавым танкам».

Украінскія вайскоўцы на вайне пачалі выкарыстоўваць баявыя французскія браняваныя машыны AMX-10 RC.

Відэа выкарыстання тэхнікі было апублікаванае ў Telegram-канале Страткам УСУ.

Як расказалі ва ўстанове, у войску AMX часам завуць «колавым танкам». Нягледзячы на тое, што асноўнае прызначэнне AMX – выведныя дзеянні, гэтая тэхніка выконвае задачы менавіта як сродак агнявой падтрымкі.

«Яна лёгкая, манеўраная і прахадная. Больш за ўсё падабаецца яе хуткастрэльнасць – гэта адна з пераваг AMX», – расказалі вайскоўцы.

AMX-10 RC – гэта французская баявая браняваная машына вытворчасці GIAT Industries для выведных мэтаў. Яе таксама называюць колавым знішчальнікам танкаў ці нават лёгкім танкам.

Упершыню была прапанаваная французскім войскам у 1981 годзе. Яе асноўным баявым узбраеннем з'яўляецца дакладная 105-мм гармата F2 BK MECA L/47, дапоўненая ўніверсальным 7,62-мм кулямётам NF1 або 12,7-мм буйнакаліберным кулямётам M2HB для павышэння агнявой моцы.