У менскім аэрапорце расказалі, што прапанавалі палепшыць «таемныя пасажыры»

Некаторыя пажаданні ўжо выканалі.

Вынікі праграмы "Таемны пасажыр" у Нацыянальным аэрапорце Менск падвядуць у канцы гэтага года, але там ужо атрымалі некалькі прапаноў, як палепшыць сэрвіс. Пра гэта паведамілі ў эфіры тэлеканала «Мир 24».

“Мы ўжо бачым прапановы аб транспартных злучэння з аэрапортам - аб неабходнасці змены раскладу аўтобусаў у аэрапорт, з аэрапорта. У дачыненні да паркоўкі ў аэрапорце”, - распавяла начальніца аддзела кіравання якасцю і бяспекай палётаў Нацыянальнага аэрапорта Менск Алена Букаціч.

Былі таксама прапановы дадаць больш крам у аэрапорце і месцаў грамадскага харчавання, каб час чакання рэйса быў больш камфортным.

Дарэчы, некаторыя пажаданні "таемных пасажыраў" ужо выканалі. Напрыклад, скарэктавалі меню рэстарацый, бараў і кавярняў. Там зараз можна замовіць халяльныя стравы. Аэрапорт атрымаў адпаведны сертыфікат. Можна будзе, акрамя дранікаў, замовіць рыбу, малочныя стравы, морапрадукты, гародніну і садавіну.

Таксама адзначаецца, што пасажыры могуць цяпер падчас пакупкі білета паведаміць свае пажаданні наконт харчавання на борце, напрыклад, калі хочуць халяльную страву.