Рыгор Кастусёў перадаў верш з-за кратаў

Сёння палітвязню споўнілася 67 гадоў.

Старшыня Партыі БНФ Рыгор Кастусёў ужо тры гады ў няволі. 17 красавіка палітвязню споўнілася 67 гадоў. Зяць Кастусёва Зміцер Антончык распавёў «Радыё Свабода» пра апошнія звесткі ад зняволенага.

У нядаўнім лісце са зняволення Рыгор Кастусёў пісаў:

«Хутка будзе тры гады з таго дня касманаўтыкі… Тры гады. За гэты час пастарэў на тры гады і ўсё не магу звыкнуць дагэтуль да свайго выгляду, калі гляджу ў люстэрка. Не магу ўсвядоміць, што здарылася ў плане здароўя».

Нядаўна Кастусёва перавялі ў крытую турму ў Гародні. Нягледзячы на выяўленне анкалагічнага захворвання, умовы яму не палегчылі, а пагоршылі. Але 1 красавіка сваякам палітвязня стала вядома, што яму зрабілі аперацыю - вывелі катэтар з мачавога пухіра. Гэта зняло небяспеку яго разрыву, але ўскладніла знаходжанне ў зняволенні.

Пасля аперацыі Кастусёва адправілі назад у камеру. У апошніх лістах ён пісаў, што яму рабілі аналіз крыві, і што паказчыкі дрэнныя: удвая падвышаны бялок у крыві. Таксама павялічаныя лімфавузлы, турбуе варыкоз на нагах.

«Але ён не любіць пра гэта шмат паведамляць і думаць, – расказвае пра Кастусёва Зміцер Антончык. - Затое працягвае пісаць вершы. Вось даслаў верш, прысвечаны сваёй роднай вёсцы Цяхцін».

Ён пачынаецца так:

Не забываю тых мясцін,

Што мне даюць натхненне, сілы,

Пад рэдкай назваю Цяхцін,

Ад нараджэння родны, мілы…

Верш з 9 радкоў заканчваецца тым, што журналісты назвалі фактычным запаветам на выпадак смерці ў няволі:

…Пад шэры камень. Толькі той,

Што ўзяты з родных мне мясцінаў.

І невялікаю плітой,

Дзе бачна, хто каго пакінуў.

Цяхцін - вёска ў Бялыніцкім раёне Магілёўскай вобласці, дзе Кастусёў нарадзіўся.