Мядзведзеў запатрабаваў абвясціць тысячы расейцаў «замежнымі агентамі»

І ўвесці для іх крымінальнае пакаранне.

У Расеі неабходна рэзка павялічыць колькасць "замежных агентаў" і прадугледзець для іх крымінальную адказнасць, заявіў намеснік старшыні Савета бяспекі РФ Дзмітрый Мядзведзеў.

Паводле ягоных слоў, для гэтага трэба змяніць закон "Аб кантролі за дзейнасцю асоб, якія знаходзяцца пад замежным уплывам". Яго можна дапоўніць асобнымі пунктамі з закона ЗША аб рэгістрацыі замежных агентаў (Foreign Agents Registration Act, FARA).

«Напрыклад, устанавіць крымінальную адказнасць для замежных агентаў, як у Штатах. І паступова давесці колькасць замежных агентаў да тысяч, як у іх. Што там нашы мізэрныя сотні. Бо ёсць вартыя кандыдаты. Дакладна ёсць. Шукайце лепш! - напісаў у тэлеграм-канале Мядзведзеў.

Пры гэтым ён назваў ЗША "паслядоўнымі людзьмі", паколькі яны з 1938 года, калі быў прыняты ўказаны закон, "непрымірымыя да ворагаў сваёй дзяржавы".

Расейскае заканадаўства ўжо прадугледжвае крымінальную адказнасць для "замежных агентаў". Так, праца "замежных агентаў" без уключэння ў рэестр можа пацягнуць як адміністрацыйнае, так і крымінальнае пакаранне. Максімальнае пакаранне для кіраўніцтва арганізацый і СМІ-“замежных агентаў” у гэтым выпадку - да двух гадоў пазбаўлення волі, а для фізічных асоб-замежных агентаў - да пяці гадоў (арт. 330.1 Крымінальнага кодэкса). За злоснае ўхіленне ад выканання сваіх абавязкаў, у тым ліку за адсутнасць маркіроўкі і справаздачнасці, "замежным агентам" таксама пагражае крымінальнае пакаранне.

Паняцце "замежны агент" упершыню з'явілася ў расейскім заканадаўстве ў 2012 годзе і спачатку распаўсюджвалася толькі на НКА, якія вядуць палітычную дзейнасць. Закон аб СМІ-замежных агентах быў прыняты ў 2017 годзе. У 2019-м у яго былі ўнесены папраўкі, згодна з якімі гэты статус можа быць прысвоены фізічным і юрыдычным асобам, калі яны распаўсюджваюць або ўдзельнічаюць у стварэнні інфармацыі СМІ-замежных агентаў і фінансуюцца з-за мяжы.

Згодна з законам "Аб кантролі за дзейнасці асоб, якія знаходзяцца пад замежным уплывам", падпісаным у ліпені 2022 года, для прызнання "замежным агентам" неабавязкова атрымліваць фінансаванне з замежнай крыніцы - у рэестр можна будзе трапіць у тым ліку за "падтрымку з-за мяжы" або за знаходжанне пад "замежным уплывам". Таксама было ўведзенае паняцце фізічнай асобы, афіляванай з "замежным агентам".

З 1 снежня 2022 года Мінюст публікуе адзіны пералік "замежных агентаў". На гэты момант у ім знаходзяцца 656 арганізацый і фізічных асоб.