Намесніка дырэктара прыватнай рэкламнай тэлекампаніі ў Гомелі знайшлі мёртвым

Сам дырэктар знаходзіцца за кратамі паводле палітычнага артыкула.

Намеснік дырэктара прыватнай рэкламнай тэлекампаніі ў Гомелі "ФілТБ" знойдзены мёртвым, паведаміў пошукава-выратавальны атрад "Сімуран".

Раней паведамлялася, што ўночы 1 красавіка мужчына выйшаў з дому ў невядомым кірунку і не вярнуўся.

Як пісаў “Флагшток”, у канцы сакавіка вядомага гомельскага бізнэсоўцу, заснавальніка і дырэктара прыватнай рэкламнай тэлекампаніі «ФілТБ» Віталя Філінскага асудзілі на 15 дзён за “распаўсюд экстрэмісцкіх матэрыялаў”. Адбыўшы пакаранне, ён не выйшаў на волю і атрымаў яшчэ 15 дзён. У той жа час высветлілася, што ягоны намеснік знік без вестак.

“ФілТВ” - гэта адзінае ў Гомельскай вобласці рэкламнае агенцтва поўнага цыклу, якое займаецца распрацоўкай рэкламнай ідэі, яе ўвасабленнем і размяшчэннем атрыманага рэкламнага прадукту на ТВ-каналах. Кампанія паспяхова працавала з 1996 года, выконвала ў тым ліку дзяржаўныя замовы. Аднак у апошнія гады ў прадпрыемства пачаліся праблемы - нягледзячы на гэта, яно працягвала працу, хоць і ва ўрэзаным выглядзе.