У менскім аэрапорце затрымалі расейца

Ён спрабаваў вывезці дачку ў Шарм-Эш-Шэйх з фальшывым пашпартам.

У менскім аэрапорце памежнікі затрымалі мужчыну, які спрабаваў вывезці паўтарагадовую дачку за мяжу з фальшывым пашпартам.

Як расказалі ў прэс-службе Дзяржпагранкамітэта, 25 сакавіка пры афармленні рэйса Мінск — Шарм-Эш-Шэйх грамадзянін РФ падаў падроблены пашпарт свайго паўтарагадовага дзіцяці. Мужчыну затрымалі.

Падчас допыту грамадзянін Расеі растлумачыў, што цяпер ён знаходзіцца ў шлюбаразводным працэсе, а сапраўдны пашпарт дзіцяці знаходзіцца ў жонкі. У сувязі з гэтым мужчына надумаў купіць пашпарт для дачкі ў інтэрнэце і незаконна вывезці яе за мяжу.

Расейца перадалі супрацоўнікам міліцыі, а дзіця вярнулі маці.