Арменія пагадзілася перадаць яшчэ чатыры вёскі Азербайджану

Мяжа будзе дэмаркаваная.

Арменія і Азербайджан дэмаркуюць дзяржаўную мяжу на адрэзку з чатырох сёлаў, піша ІА «Арменпрэс» са спасылкай на ліст ад апарату прэм'ер-міністра Нікола Пашыняна. Размова ідзе пра населеныя пункты Баганіс Айрум, Ашагы-Аскіпара, Хейрымлі і Кызыл-Гаджылы, якія пяройдуць пад кантроль Баку.

У апараце Пашыняна патлумачылі, што гэта робіцца для «зніжэння рызык», звязаных з дэлімітацыяй мяжы і бяспекай. Там таксама паведамілі, што бакі папярэдне ўзгаднілі дэлімітацыю межаў на адрэзках армянскай вёскі Баганіса, азербайджанскага Баганіс Айрума, армянскага Васкепара, азербайджанскага Ашагы-Аскіпара, армянскага Кіранца, азербайджанскага Хейрымлі, армянскага Беркабера, азербайджанскага Кызы.

«Гэта азначае, што дзве камісіі зверылі на мапе тыя межы, якія існавалі паміж згаданымі сёламі ў часы Савецкага Саюза, і на наступным этапе гэтыя межы павінны быць удакладненыя і адлюстраваныя таксама на зямлі, і гэта стане беспрэцэдэнтнай падзеяй: упершыню паміж нашымі краінамі будзе дэмаркаваная дзяржаўная мяжа на адрэзку гэтых чатырох сёлаў», – падкрэслілі ў апараце.

Бакі павінны будуць да 15 траўня падпісаць пратакол з апісаннем ліній мяжы «з улікам удакладнення каардынатаў на падставе геадэзічных вымярэнняў на мясцовасці», паведамілі ў МЗС Арменіі. Пры гэтым межы будуць уважаць за дэлімітаваныя да поўнага заканчэння працэсу.

Працэс дэлімітацыі будзе грунтавацца на Алма-Ацінскай дэкларацыі 1991 года, падпісанай Ерэванам і Баку пасля распаду СССР. Дакумент замацоўваў тэрытарыяльную цэласнасць былых савецкіх рэспублік у межах 1991 года.