«Страшна ездзіць праз такіх!»

Беларускім кіроўцам далі «карысную» параду.

Беларускі блогер паказаў у TikTok, як праязджае скрыжаванні з колавым рухам. Ён параіў усім беларусам так рабіць. Але ёсць нюанс. Яго парада - парушэнне правіл ПДР. А санкцыі за такую язду - ад штрафу да пазбаўлення пасведчання.

Мужчына зняў відэа ў Менску на плошчы Перамогі, дзе перад уездам на колавы рух заявіў, што трэба ўключаць левы паварот, нават калі збіраецца пасля праезду плошчы прадоўжыць рух проста.

У каментарах гледачы абрынуліся на яго з крытыкай, бо ягоная парада — наўпроставае парушэнне ПДР РБ. Аднак аўтар відэа працягваў у адказах на каментары намагаць, што як хоча, так і будзе ездзіць. Хоць і прызнаўся, што сам на пасведчанне здаваў яшчэ ў 2005 годзе. Відаць, пасля гэтага ён іх не чытаў і пра змены нічога не ведае.

У якасці доваду ён напісаў: «А разумееце, чаму трэба і чаму не трэба. Вам скажуць на чырвоны па ПДР ехаць, вы паедзеце?»

«Паводле вашай логікі, навошта тады наогул ПДР?!» - спыталі ў яго гледачы.

«Дык вы потым пакажыце паваротнік, куды паедзеце», — дала правільную параду яшчэ адна падпісчыца.

«Што вы з гэтым левым паваротам!!! Калі ўжо зробіце ласку не па сваім інтэрпрэтаваць ПДР, а проста выконваць іх! Страшна ездзіць праз такіх!» - абурыўся яшчэ адзін глядач.

Як трэба праязджаць перакрыжаванні паводле Правіл дарожнага руху ў Беларусі?

Насамрэч, многія беларускія кіроўцы дагэтуль уключаюць левы паварот на колавым руху, нават калі збіраюцца ехаць «проста», не з'язджаючы з «кола».

Гэта было парушэннем і раней, але праз тое, што многія кіроўцы інтэрпрэтавалі ПДР на сваё меркаванне, а наўпроставага ўказання ў правілах на гэты конт не было. Часта кіроўцы думалі, што на кольцы здзяйсняюць манеўр, паварочваючы налева.

Каб пазбегнуць падвойных тлумачэнняў, у артыкуле 57 ПДР Беларусі, якія набылі моц у 2022 годзе, проста напісалі: «Пры ўездзе на скрыжаванне, дзе арганізаваны колавы рух, падача сігналу светлавымі паказальнікамі павароту не ажыццяўляецца».

У правілах няма ніякіх агаворак ці выключэнняў. А ўсякае парушэнне ПДР пагражае адміністрацыйнымі санкцыямі. У гэтым выпадку ад штрафу да нават пазбаўлення пасведчання.

Дарэчы, пры з'ездзе з кола кіроўца акурат абавязаны загадзя паказаць правым паваротнікам, што збіраецца здзейсніць манеўр і з'ехаць з кола.

Але, калі такія паводзіны кіроўцы пацягнулі стварэнне аварыйнай абстаноўкі, то штраф можа быць у суме ад пяці (200 руб) да дваццаці базавых адзінак (800 руб). І нават пазбаўленнем пасведчання тэрмінам да двух гадоў.

Не варта давяраць усяму, што ўбачыце ў інтэрнэце. Памятайце, што ў сетцы могуць параіць і такое, што наступствы давядуць і да «крыміналкі» ў выпадку цяжкіх наступстваў. Ездзіць на аўтамабілі трэба паводле ПДР, а не па паняццях.