Ракеты ATACMS сарвалі сезон у Крыме яшчэ да вылету па цэлях

«Усе такія напружаныя, раздражнёныя».

Травеньскія святы ў акупаваным Крыме зноў сарваныя. Расейскія турысты пасля навін аб тым, што Украіна вось-вось атрымае ад ЗША дальнабойную зброю, у тым ліку ракеты ATACMS, баяцца ўдару па Керчанскім мосце і аддаюць перавагу курортам Краснадарскага краю.

Бізнэс уцякае з Крыма, цэны нерухомасці ўпалі ў 1,05/02 разы ў параўнанні з 2021 годам. Усё таму, што акупанты, якія ўклалі сродкі ў кватэры і дамы ля Чорнага мора, ужо не вераць, што «Крым з Расеяй назаўжды», піша OBOZ.UA.

«Усе такія напружаныя, раздражнёныя»

«Улада» акупаванага паўвострава ўжо папярэдзіла расейскіх кіроўцаў, што калі яны збяруцца на травеньскія святы ў Крым, іх дбайна правераць на ўездзе на Керчанскі мост.

І параілі браць з сабой менш рэчаў, каб агляд праходзіў хутчэй. Тыя, хто ўжо едзе праз мост, расказваюць, што праверкі зацягваюцца, а калі мост яшчэ перацінаюць па некалькі разоў на дзень, то чакаць у чарзе можна да пяці гадзін.

«Глядзяць усюды, ува ўсіх торбах, прымушаюць усё выкласці. Калі ў цябе кампутар, то яго правераць, а яшчэ праглядзяць тэлефоны. Потым абшукаюць аўтамабіль. Мы прастаялі ў чарзе амаль чатыры гадзіны. Я нават не ўяўляю, колькі давядзецца чакаць на зваротнай дарозе», – паскардзіўся адзін з кіроўцаў з Ніжняга Ноўгарада.

Таксама турысты пішуць, што мост часта перацінаюць, і таму ўзнікаюць кіламетровыя коркі.

«Я, канешне, разумею, гэта ў мэтах бяспекі, у тым ліку і нашай. Але мне здаецца, што яны нават птушку ў небе ўбачаць - і адразу ж у іх трывога. Усе такія напружаныя, раздражнёныя, бесперапынныя пытанні: куды едзеце, навошта. Ты таксама адразу становішся такім жа нервовым і думаеш, а ці не павярнуць назад ад граху далей», - дзеліцца масквічка Валянціна.

Паніку разганяюць і расейскія вайсковыя Telegram-каналы. Там ужо пішуць, што менавіта падчас травеньскіх святаў УСУ могуць атакаваць ракетамі Крымскі мост, палохаюць крымчукоў самалётамі і беспілотнікамі краін NATO, літаральна дзень і ноч сочаць за акупаваным паўвостравам.

Едуць толькі жыхары паўвострава

Крымчукі прагназуюць, што сёлетні курортны сезон напаткае лёс леташняга, калі турысты не прыехалі.

«Калі прыедзе мала людзей на травеньскія святы, дык і сезон будзе такім жа. А едзе вельмі мала. Я б сказала, што зараз галоўныя нашы турысты і карміцелі - самі крымчукі, якія едуць да мора з глыбіні паўвострава. Яны ўжо да ўсяго прызвычаіліся, да выбухаў, трывогі, калон вайсковай тэхнікі. Вось у мяне на травеньскія будзе заняты толькі адзін нумар, прыедзе сям'я з Джанкоя», - кажа ўладальніца гатэля Ала з Еўпаторыі.

У пансіянатах і санаторыях зноў будуць адпачываць па прафсаюзных турах, а таксама расейскія вайскоўцы. Там запаўняльнасць на травеньскія 50-60%.

Нават птушак у небе баяцца: як ракеты ATACMS сарвалі травеньскі сезон у Крыме яшчэ да вылету па цэлях.

Многія крымскія гатэлі яшчэ не адкрыліся, бо няма попыту. Хоць кошты ў параўнанні з мінулым годам у гатэлях і прыватным сектары не падвышаліся. На пляжах у сонечныя красавіцкія дні загараюць мясцовыя жыхары, па набярэжнай Ялты таксама зараз гуляюць пераважна крымчукі.

«Якія шашлыкі, аб чым вы кажаце! У мяне шмат знаёмых дробных бізнэсоўцаў, якія трымаюць свае пункты ў горадзе - кавярні, рэстарацыі. Яны ўжо не ведаюць, як пазбавіцца свайго бізнэсу. Попыту няма, турыстаў няма, а падаткі трэба плаціць. Расейцы не жадаюць рызыкаваць, каму цікава па начах прачынацца ад сірэн або выбухаў. А потым не ведаць, як з'ехаць, калі мост разбураць. Хто мае грошы - едзе ў Сочы або Турцыю. Астатнія да сябе на лецішчы паедуць», - кажа жыхар Алушты Віктар.

Цэны нерухомасці ўпалі, будаўніцтва замарожанае

Адна з рыэлтараў паўвострава Валерыя распавяла, што цяпер кошт нерухомасці ўпаў у 1,05/02 разы ў параўнанні з 2021 годам, і ўсё праз тое, што многія прыезджыя распрадаюць жыллё.

“Яны прыехалі сюды і думалі, што тут будуць жыць. Іншыя скупілі квадратныя метры ў новабудоўлях. Цяпер сітуацыя змянілася, чый будзе Крым - ужо ніхто не ведае. Частка інвестараў, якія ўклаліся ў будаўніцтва ЖК, страцілі грошы, бо будаўніцтва замарожанае. Няма ахвочых інвеставаць, уладальнікі будаўнічых кампаній жывуць дзесьці ў Маскве ці Піцеры, яны спынілі будаўніцтва, людзі засталіся ні з чым», - кажа Валерыя.

З яе слоў, людзі прадаюць сваё жыллё нізкімі коштамі, бо баяцца заставацца тут. Астатнія проста з'ехалі і хіба што змаглі здаць нерухомасць у доўгатэрміновую арэнду.

«Разумееце, пасля 2014 года расейцы на хвалі патрыятызму ці цікаўнасці пачалі прыязджаць у Крым жыць. Адны арандавалі жыллё, іншыя набывалі. Пажылі два-тры гады і зразумелі, што гэта не іх. Яны прывыклі да вялікіх гарадоў, нейкага руху. А тут курортная правінцыя з маскоўскімі коштамі. Яшчэ і аэрапорт закрылі, па мосце пачалі страляць...» - распавядае рыэлтарка.