Абмежаванні для сем'яў з дзецьмі, удар па «дармаедах», падаражанне квіткоў: што зменіцца для беларусаў у траўні

Новаўвядзенні, якія паўплываюць на таўшчыню партманэтаў.

З 1 траўня ў Беларусі падаражэе праезд у гарадскіх і рэгіянальных цягніках. У наступным месяцы таксама ўвядуць чарговыя абмежаванні для сямейнага капіталу і навіну па «дармаедстве».

У траўні яшчэ перагледзяць сумы мінімальных працоўных і сацыяльных пенсій, а таксама некаторыя дапамогі на дзяцей і бюджэт пражытковага мінімуму. Для пенсіянераў увядуць зніжку на праезд у электрычках (але спачатку павысяць кошты квіткоў для ўсіх).

Журналісты zerkalo.io склалі падборку травеньскіх змен, якія могуць паўплываць на таўшчыню партманэтаў беларусаў.

Абмежаванне для сямейнага капіталу і «дармаедаў»

З 28 траўня ў Беларусі ўвядуць новыя абмежаванні для сямейнага капіталу. Адна з навін тычыцца «дармаедства» - некаторым сем'ям, у якіх бацька трапіць ва «ўтрыманцы», не будуць прызначаць сямейны капітал. Яны таксама не змогуць датэрмінова выкарыстоўваць гэтыя сродкі.

Гэтак жа ўвязанае з занятасцю бацькі і права на датэрміновае распараджэнне сямейным капіталам. «Калі сям'я мае выкарыстоўваць гэтыя сродкі па кожнаму з кірункаў, працаздольны бацька, айчым у поўнай сям'і, бацька ў няпоўнай сям'і павінен быць заняты не менш як 12 месяцаў у двухгадовым перыядзе перад зваротам», - тлумачылі раней у Мінпрацы.

Паспець заплаціць падаходны падатак

Да 3 чэрвеня трэба ўнесці падатак за 2023 год. За парушэнне гэтага дэдлайна пагражае штраф. Калі сума нявыплачанага (або недаплачанага) збору перавысіць палову базавай адзінкі (на сёння гэта 20 рублёў), то штраф складзе 15% ад нявыплачанай сумы падатку. Пры гэтым ён не можа быць меншы за палову базавай адзінкі. Размова ідзе пра тых, хто паспеў падаць падатковую дэкларацыю за мінулы год.

Перагледзяць некаторыя дапамогі на дзяцей і пенсіі

З 1 траўня павялічаць бюджэт пражытковага мінімуму - да 418,73 рубля. Прапарцыйна росту БПМ мяняюцца і сумы некаторых дапамог, якія выдаюцца пры нараджэнні дзяцей. Новая сума БПМ будзе дзейнічаць да канца ліпеня.

Аднаразовую дапамогу жанчынам, якія сталі на ўлік у дзяржаўных арганізацыях аховы здароўя да 12-тыднёвага тэрміну цяжарнасці, таксама перагледзяць.

З наступнага месяца таксама зменяць і сумы мінімальных працоўных і сацыяльных пенсій, якія прывязаныя да сумы бюджэту пражытковага мінімуму. Напрыклад, сацыяльная пенсія вырасце да 209,37 рубля (цяпер яна складае 203,37 рубля).

Абновяць базу «дармаедаў»

У траўні ўлады актуалізуюць спіс працаздольнага насельніцтва, якое не занятае ў эканоміцы. Тым, хто патрапіць у яго і ў каго ёсць ва ўласнасці жыллё, давядзецца аплачваць поўнымі тарыфамі не толькі гарачае водазабеспячэнне, але таксама ацяпленне і газ. Нагадаем, з 1 красавіка гэтага года гэтую базу абнаўляюць штомесяц.

Для пенсіянераў увядуць зніжку на праезд у электрычках (і падвысяць кошты квіткоў для ўсіх)

З 1 траўня для пенсіянераў увядуць прывычную 50% зніжку на праезд у цягніках рэгіянальных ліній эканомкласа. Ільгота будзе дзейнічаць да канца кастрычніка - на час сезонных сельскагаспадарчых работ. Таксама з 1 траўня ў Беларусі павысяць кошт праезду ў гарадскіх і рэгіянальных цягніках, а таксама на перавозку багажу.

Перанос працоўнага дня і доўгія выходныя

У Беларусі ў траўні - доўгія выходныя. Так, у наступным месяцы адпачываць будзем 1, 9 і 11-14 траўня. Рабочы дзень з панядзелка, 13 траўня, пераносіцца на суботу, 18-га. Пры гэтым урад не стаў пераносіць працоўны дзень з пятніцы, 10-га, каб у беларусаў было шэсць выходных запар - з 9 да 14 траўня. Затое гэта зрабілі на асобных прадпрыемствах.

Арганізацыі могуць з улікам спецыфікі працы пераносіць працоўныя дні ў іншым парадку, удакладнялі раней у Мінпрацы.

Вырастуць кошты цыгарэт

У Беларусі з 1 траўня падаражэюць некаторыя маркі цыгарэт. Да прыкладу, «Тытунь-інвест» у наступным месяцы павысіць кошт многіх марак цыгарэт. Падаражанне будзе ў межах 5-45 капеек. Да прыкладу, на пяць капеек вырастуць кошты цыгарэт «Карона». На 45 капеек падаражэе Sobranie Caster - да 7,1 рубля.

Таксама ў траўні падымае кошты кампанія «Сэнтоні ПРА» і «Беларусьгандаль». Фірмы «Інтэр Табака» і Гарадзенская тытунёвая фабрыка «Нёман» не маюць намеру ў траўні павышаць кошт цыгарэт.

Кампаніям трэба паспець заплаціць аванс па падатках

Арганізацыям трэба да 22 траўня ўнесці аванс па зямельным падатку за гэты год. Гэта чарговы ўнёсак. Наступны будзе да 22 жніўня, а затым - да 22 лістапада. Аб гэтым папярэджваюць падаткавікі.