ЗША націснулі на балючае месца Кітая

Выніковая заява дзяржсакратара Блінкена раскрыла ўсе карты.

Калі Кітай не пачне ўжываць захады, каб развязаць пытанне падтрымкі Расеі, то гэтае пытанне ўрэгулюе Вашынгтон.

Пра гэта заявіў дзяржаўны сакратар ЗША Энтані Блінкен пасля перамоваў з лідарам Кітая Сі Цзіньпінам.

З яго слоў, Кітаю не ўдасца наладжваць стасункі з Еўропай, калі ён будзе працягваць падтрымліваць Расею. Блінкен падкрэсліў, што гарантаванне трансатлантычнай бяспекі з'яўляецца адным з галоўных інтарэсаў ЗША.

Вельмі добрая прамова, дзе раскрываюцца ўсе карты. ЗША не проста так робіць гэта публічна, нагадваючы, хто apex predator на нашай планеце. Кітаю пляваць на Украіну (зрэшты, як і на Расею, хіба што толькі не на яе рэсурсы) і ЗША для іх геапалітычны апанент, але Еўропа - гэта цэнтральны рынак збыту.

Кітай ужо ў 2020 годзе выйшаў на першае месца ў спісе найважнейшых гандлёвых партнёраў Еўрапейскага Звязу з аб'ёмам гадавога замежнагандлёвага тавараабарачэння на 586 млрд еўраў. І менавіта таму Блінкен паказвае, што Расея ўяўляе пагрозу еўрапейскай бяспецы, а не толькі Украіне, тым самым нівеліруючы крамлёўскі наратыў аб тым, што гэта «ўнутраны» расейскі канфлікт выключна ў зоне яе інтарэсаў.

Амерыканцам агулам вельмі шматлікія сусветныя працэсы абыякавыя, ім не абыякава толькі адно: каб сусветны парадак працягваў функцыянаваць не па праве беззаконня бяздарных, другасных дзяржаў, якія нічога не даюць свету: ні тэхналогій, ні ведаў, ні ўнікальных адкрыццяў і г.д.

Ігаль Левін