Генеральны сакратар NATO паабяцаў Украіне сістэмы СПА і сяброўства ў альянсе

У Кіева ёсць шанец перамагчы РФ.

Паўночнаатлантычны альянс працуе над пастаўкамі сістэм СПА Кіеву і спадзяецца на ўступленне Украіны ў NATO, заявіў генеральны сакратар арганізацыі Енс Столтэнбэрг.

«Але трэба, каб Украіна стала як мага хутчэй сумяшчальнай з войскамі NATO. У будучыні Украіна стане чальцом NATO. Гэты шлях да сяброўства няўхільны», - цытуе яго УНІАН.

З яго слоў, NATO працуе над тым, каб даставіць вялікую колькасць сістэм СПА Кіеву, бо ва Украіны ёсць шанс перамагчы.

Прэзідэнт Украіны Уладзімір Зяленскі на супольнай прэс-канферэнцыі са Столтэнбэргам заявіў, што перахоп ініцыятывы на фронце і магчымы наступ УСУ залежаць ад своечасовых паставак узбраення і міжнароднай фінансавай дапамогі Украіне.

«Сёння пазітыву ў гэтым пункце я пакуль не бачу. Пастаўкі ёсць. Яны пакрысе пайшлі. Трэба гэты працэс паскорыць», - дадаў кіраўнік дзяржавы.

Раней Зяленскі заявіў, што Кіеў і Вашынгтон вядуць перамовы аб аб'ёмах дапамогі на наступныя дзесяць гадоў у рамках «самай моцнай» двухбаковай дамовы ў галіне бяспекі.

Украіна вядзе перамовы з ЗША аб наданні гарантый бяспекі са жніўня 2023 года. Паводле інфармацыі The Washington Post, у дакумент могуць увайсці падтрымка кароткатэрміновых ваенных аперацый, стварэнне ў будучыні ўкраінскіх сіл, «якія змогуць стрымліваць расейскую агрэсію», фармаванне ахоўных «бурбалак» вакол ўкраінскіх гарадоў і аднаўленне ключавых галін эканомікі і экспарту.

На саміце NATO ў ліпені 2023 года краіны G7 падпісалі дэкларацыю аб наданні Украіне гарантый бяспекі. Згодна з дакументам, кожная краіна, якая падтрымала гэту ініцыятыву, павінна правесці перамовы з украінскім бокам для вызначэння канкрэтных доўгатэрміновых абавязацельстваў.

Пасля гэтага двухбаковыя пагадненні аб гарантыях бяспекі з Украінай падпісалі Вялікая Брытанія, Нямеччына, Францыя, Данія, Канада, Італія, Нідэрланды, Фінляндыя і Латвія. Прэм'ер-міністр Украіны Дзяніс Шмыгаль заяўляў, што Кіеў спадзяецца падпісаць такія дамовы больш чым з 30 дзяржавамі.