Чацвёртакласнік з Віцебска выдаткаваў грошы настаўніцы на онлайн-гульні

Педагог прапажу выявіла не адразу.

Настаўніца малодшых класаў з Віцебска пакінула без нагляду банкаўскую картку ўсяго на пару хвілін і пазбавілася 900 рублёў. Падрабязнасці інцыдэнту паведаміла старшая оперупаўнаважаная ўправы ў супрацьдзеянні кіберзлачыннасці УУС Віцебскага аблвыканкама Ганна Галінская, піша выданне «Віцьбічы».

Званок на перамену з чарговага ўрока чакалі не толькі дзеці, але і педагог. Жанчына ведала, што пасля занятку павінна адбыцца нарада, якую нельга было прапусціць. На сход віцяблянка прыйшла своечасова, але без асабістых рэчаў, сярод якіх была яе банкаўская картка.

Прайшоў месяц, жанчына сабралася мяняць картку, і высветліла, што з яе рахунку зніклі 900 рублёў. Яна звярнулася ў міліцыю.

Высветлілася, што карткай настаўніцы скарыстаўся чацвёртакласнік. Ён сфатаграфаваў забытую педагогам перад нарадай карту і стаў аплачваць узмацненне свайго героя ў папулярнай онлайн-гульні.

Шчодрыя данаты дазволілі хутка падвысіць свой рэйтынг. Разам з ім выраслі і праблемы для ягоных бацькоў, якім давядзецца вяртаць грошы.